Pintar-Pintar presenta'l programa 'CREActividades' pa los trés meses próximos, que s'amplía a los xueves

'CREActividades', la iniciativa de Pintar-Pintar d'entamu d'actividaes artístiques pa neños y neñes de 6 a 13 años nel Centru Niemeyer, yá cuenta con programa definíu pa los trés meses próximos. La novedá d'esti trimestre ye l'ampliación de les sesiones a los xueves.

La selmana pasada tuvo la primer sesión, que va continuar esti xueves col primer taller de los dos previstos de trabayu con escayola pa ellaborar "bichos de pates llarges". Son los primeros de munches actividaes que tamién van tratar sobre los mitos asturianos, los montes o cases estraordinares al traviés de la pintura o'l magre, ente otros.

Estos talleres van desendolcase los xueves y sábados, de 17.30 a 19 hores, y pa participar ye necesario apuntase con al menos dos díes d'antelación. Cada actividá tien un preciu variable, qu'inclúi los materiales, anque ye posible apuntase a toles del mes y algamar un descuentu.

Esta iniciativa de Pintar-Pintar tien l'oxetivu de "desarrollar y incentivar la capacidá inventiva y la esploración de los neños y neñes participantes" nun tiempu nel que la imaxinación y la creación queda arrequexada énte la llegada de les nueves teunoloxíes. 'CREActividades Pintar-Pintar' ta destináu a neños y neñes de 6 a 13 años, anque tamién pueden participar críos y críes más pequeños si van acompañaos d'un adultu.

Pa consultar el programa completu ha de calcar equí.