Pino pide un conceyu con FADE pa resolver el bloquéu de 64 convenios y prevé movilizaciones n'ochobre

Antonio Pino, secretariu xeneral de CO OO d’Asturies, recordó esti llunes que n’Asturies permanecen 64 convenios bloquiaos. Pa iguar esta situación, qu’afeuta a 37.000 trabayadores, ta acabante de pidir un aconceyamientu con García Vigón.
 
Esi bloquéu, según el dirixente sindical, ye “frutu de l'aición de los empresarios”. “Si nun llogramos que la patronal los desbloquie, va haber conflictividá”, alvirtió Pino, que previó que n'ochobre haya “fuertes movilizaciones”. Pa tratar de reconducir la situación, el sindicalista anunció esti llunes enantes de la presentación n'Uviéu del so informe xeneral al Conseyu del sindicatu, organismu máximu de direición de Comisiones Obreres (CC OO), que ta acabante de solicitar un aconceyamientu con Severino García Vigón, presidente de la Federación Asturiana d’Empresarios (FADE).
 
N’Asturies hai agora 64 convenios bloquiaos, a los qu’hai que sumar cerca de 80 d'ámbitu estatal que son d'aplicación n'Asturies que tamién remataron la so vixencia nel 2009 o 2010 ensin anovase. El más importante de toos ye’l del metal, qu’afeuta a 18.000 trabayadores, seguíu del de minoristes d’alimentación, del que tán pendientes 10.000 persones.
 
Contra los recortes del Gobiernu
 
Nes sos declaraciones, Pino tamién aprovechó pa criticar l’aición del Gobiernu de Foro Asturias Ciudadano (FAC) al frente del país. El sindicalista señaló que l’Executivu “va lentu” nel so funcionamientu y que nun alcanza el ritmu qu’esixe la situación actual de crisis. “Yá ye hora de que’l Gobiernu reaccione”, reclamó.
 
Según el sindicalista, el Gobiernu de Francisco Álvarez-Casos ta anunciando recortes tanto nos presupuestos como nel sector públicu. “Nun compartimos qu’esos recortes puedan afectar al pautu de concertación social”, comentó. Por último, Pino tamién fixo referencia al aumentu del númberu de muertes n’Asturies por accidente llaboral.