Pingarates

Ya ta na cai una nueva entrega de la serie "Cantos y
Bailles d'Asturies" de Fonoastur, discu del grupu cultural "La
Xana" de Perlora, que con esta segunda parte sigue tratando'l tema de les
dances na música asturiana.

Esti cd sal col nome de "Son nes dances de rueda de calter festivu
profanu II", y n'él faise un repasu a una serie de dances, na so
mayoría recoyíes pol so direutor de baille Fernando de la Puente
Hevia, y que formen parte de la gran bayura de dances qu'hai nesti país,
y que desconocemos na so gran mayoría.

Na casa de cultura d'Amieva los próximos meses d'abril, mayu y
xunu, vamos poder ver el V Concursu de Cación Asturiana Conceyu
d'Amieva. Pa esti concursu ya tan apuntaos 75 participantes, nes categories
masculino llibre, femenino llibre, mozos menores de 30 años y cantantes
con gaita. Les próximes eliminatories sedrán 13, 20 y 27 d'abril
y 4 de mayu, les finales van ser el 11, 18 y 25 de mayu, y la entrega premios
el 1 de xunu. El gaiteru oficial ye Oscar Fernández, y los premios van
ser de 450 € pa los ganadores de toes les categoríes.

Na sección de mp3 del Cohete Internacional
podemos baxar temes de diferentes
grupos d'esta empresa, ente los que tan un conciertu completu de
"Tejedor" nel teatru Xovellanos y un tema del desapaecíu grupu
"Balandrán".