Piñán defende que la so convocatoria d’encargos “va permitir una diversificación de la producción n’asturianu por parte de la RTPA”

“La música y la cultura, tanto en castellanu como n’asturianu y gallego-asturiano, tienen un tratamientu dignu na programación de la RTPA, pero non suficiente”, respondió Berta Piñán a Podemos na Comisión de Cultura, Política Llingüísticu y Turismu. La conseyera defendió la ‘Convocatoria estraordinaria d’encargos de producción pa la promoción de la llingua asturiana y el gallego-asturiano’.

El diputáu Rafael Palacios entrugara a la escritora “si apuesta por dignificar la presencia de conteníos culturales y musicales del país (mui especialmente n’asturianu y gallego-asturianu) na programación de la RTPA, con un tratamiento dignu, global y permanente nella”. “Nun ye suficiente porque entendemos qu’entovía se pue y se tien que facer una mayor promoción y difusión de les manifestaciones culturales y artístiques, sobre manera de la creación n’asturianu y en gallego-asturiano que faiga llegar a la sociedá asturiana la riqueza y diversidá de les producciones, contribuyendo a la profesionalización del sector y a superar la crisis actual derivada de la pandemia qu’afeuta de manera específica al ámbitu cultural”, siguió, emplegando’l castellanu, Piñán.

Nesi puntu citó la ‘Convocatoria estraordinaria d’encargos de producción pa la promoción de la llingua asturiana y el gallego-asturiano’, a la que se destinaron 133.800 euros y nel que tomaron parte 48 proyeutos por una valor total de más d’un millón d’euros, de los que resultaron escoyíos 7 con una inversión final de 130.788 euros. La conseyera destacó que munches de les productores presentaes “nun trabayen habitualmente cola RTPA”, dalgo que considera “señal de la vitalidá y diversidá d’un sector que tien un gran potencial y al que tenemos qu’ayudar a consolidase y crecer”.

Sicasí, añadió que la so presencia y representavidá “nun nos paez suficiente y asina se lo treslladamos a la direición del ente siempre que tuviemos ocasión”. “Ye evidente que l’interés d’esta conseyería ye que l’asturianu y el gallego-asturiano tengan mayor presencia en tolos ámbitos y en concreto na programación ordinaria de la cadena en formatos de too tipu”, entendiendo qu’esta convocatoria “va permitir una diversificación de la producción n’asturianu y gallego-asturiano por parte de la RTPA, abriéndose a la iniciativa de más productores”.

Incumplimientu de la llexislación

Palacios treslladó a Piñán les demandes incluyíes nel manifiestu ‘Por una RTPA al serviciu de la cultura asturiana’, robláu por 118 personalidaes del sector, y criticó que nun esistiera nes canales públiques “a día de güei nengún espaciu dedicáu específicamente a la lliteratura o la música nes llingües propies del país” y que dende que “empezara la llexislatura, la radiotelevisión pública dedicó 0 euros del so presupuestu a la producción de conteníos” nestos idiomes. “Los conteníos n’asturianu y gallego-asturiano que s’emitíen en RTPA debíen ser cubiertos col propiu presupuestu del RTPA. Nun tien sentíu que la Conseyería de Cultura dedique una partida pa una radiotelevisión que yá recibe 23 millones d’euros de dineru públicu al traviés de la Conseyería de Presidencia”, afirmó.

“La direición de RTPA encabezada por Francisco Orejas niégase a cumplir cola llexislación y actúa como si TPA y RPA foren cadenes monollingües en castellanu”, insistió’l diputáu depués de recordar la normativa que diz que “tien que ser una ferramienta pa la normalización del asturianu y del gallego-asturiano”.