Piloña torna a pesllar el Serviciu de Normalización Llingüística

Per segunda vegada nesta llexislatura, el Serviciu de Normalización Llingüística de Piloña torna a dexar de funcionar. El Conceyu de Piloña decidió pesllar nesta ocasión el Serviciu un añu depués de ponelu en marcha.
 
L’Asociación de Trabayadores de Normalización Llingüística (ATNL) denunció güei esta situación que se repite nel conceyu de Piloña. El Serviciu de Normalización Llingüística, qu’abrió les sos puertes el 1 d’avientu del 2009, tuvo furrulando hasta’l 31 de marzu del 2010, esto ye, per cuatro meses. L’Ayuntamientu piloñés tornó a sacar la plaza en convocatoria pública poco depués y entamó otra vuelta a l’actividá del Serviciu’l 12 de mayu. Güei, un añu depués, el Conceyu fai la mesma xugada qu’en marzu del 2010, lo que nun dexa de ser un pasu atrás pal procesu de normalización del asturianu nel conceyu, que necesita d’un trabayu continuáu.
 
“El criteriu pa estes discontinuidaes va contra los mínimos esixibles pa un funcionamientu regular d’un SNL, que tien que facer solicitú de subvenciones, atención al públicu y programar actividaes nuna xera pa la que la continuidá ye básica. Hai conceyos pa los que tol compromisu col asturianu ye la recepción de la subvención dada pola conseyería pa la normalización. Nin siquiera esto se fai bien nel casu de Piloña, porque l’añu pasáu’l SNL tevo peslláu xusto nel momentu en que se teníen que solicitar eses subvenciones”, aseguren dende l’ATNL, que recuerda casos ablucantes asocedíos nel conceyu como la non aceptación d’escritos presentaos n’asturianu, “otra muestra de la falta de compromisu de Piloña coles polítiques normalizadores”. “¿Cómo ye posible que se reciba una subvención pa normalizar l’asturianu y nun s’almitan escritos nesta llingua? Per un llau gárrense perres, pero per otru danse palos a los usuarios de la llingua asturiana”, denundien dende’l coleutivu qu’axunta a los trabayadores d’estos servicios.
 
ATNL considera responsable últimu d’esta situación a la Direición Xeneral de Política Llingüística “porque nun lleva un mínimu de control y siguimientu de los SNL, nun pide seriedá y continuidá nes contrataciones de los conceyos, nin tampoco de les polítiques reales desarrollaes”. Aseguren que “namái apurre perres y desentiéndese del procesu”. Al respueto, señalen qu’esta postura de Política Llingüística igual s’entiende porque “los problemes de la xente que quier dirixise a l’alministración n’asturianu-y resulten ayenos a una direutora xeneral que nun usa la llingua que tendría que tar defendiendo y representando”.
 
Por último, los trabayadores de los servicios de normalización piden a Política Llingüística que “garre un papel activu nel procesu de normalización, s’aconceye col alcalde y responsables del conceyu Piloña y s’interese pola continuidá del SNL y los problemes col usu del asturianu”. Y yá puestos, “aprovechar pa revisar el restu de conceyos con SNL y la so situación actual”.