Pilar Fernández Pardo presenta les sos propuestes de normalización del asturianu

Esti sábadu 19 de mayu dende les 17,00 hores, la candidata a l'alcaldía de Xixón Pilar Fernández Pardo va presentar xunto con otros integrantes de la candidatura xixonesa del PP les sos propuestes sobre política llingüística pa la Villa de Xovellanos. Ello va ser nel Muséu del Pueblu d'Asturies nun alcuentru con representantes de los colectivos de defensa de la llingua y la cultura asturianes y empresarios comprometíos col asturianu.

Ente los puntos que va defender la candidata del PP pa la promoción del asturianu ta la redacción y aprobación d'unes ordenances municipales pal usu de la llingua asturiana , que regulen los usos llingüísticos del conceyu, onde se reconozan los drechos idiomáticos de la ciudadanía, como vien espeyao na Llei d'Usu y Promoción del Asturianu, la potenciación de la Oficina Municipal de la Llingua ,tanto en recursos económicos como en recursos humanos o'l diseñu y realización d'un Plan Municipal de Política Llingüística qu'espeyare, ente otres midíes, l'usu del logotipu del Conceyu de manera billingüe en dependencies municipales y vehículos o la creación d'un corpus alministrativu onde los distintos documentos s'impriman de forma billingüe, amás del usu del asturianu na publicidá institucional del Conceyu, y el de los topónimos oficiales y normalizaos en señales, mapes y documentos.