Piernavieja reclama en Bruxeles una ecotasa pal carbón d’importación

|
Xornaes 'Stop al Carbón d'Importación' nel Parllamentu Européu Podemos

Podemos entamó nel Parllamentu Européu unes xornaes entitulaes ‘Stop al carbón d’importación’ nel que participaron Estafanía Torres, Sofía Castañón y Héctor Piernavieja. El diputáu na Xunta Xeneral reclamó en Bruxeles una ecotasa pal carbón d’importación.

“Nun ye lóxico que si nun se ta reduciendo’l güecu térmicu nel mix enerxéticu, s’opte por utilizar carbón que ye estrayíu en condiciones llaborales y medioambientales llacerioses” señaló Piernavieja, que ve necesario establecer midíes fiscales pa garantizar que’l carbón que se consume nes térmiques de la Xunión Europea cumpla colos estándares llaborales y medioambientales. Según los datos que manexa Podemos de Red Eléctrica, l’usu del carbón incrementóse un 23,4 por cientu nel 2015, siendo España’l quintu estáu de la Xunión Europea col mayor porcentaxe de producción d’enerxía con carbón, importáu na so mayor parte: namái’l 18,3 por cientu ye d’orixe estatal.

Piernavieja criticó l’ausencia del restu d’europarllamentarios por España d’otres formaciones polítiques nestes xornaes sobre’l carbón celebraes el miércoles y ayeri nel qu’intervinieron mineros d’Asturies, Lleón y Aragón, el coleutivu Muyeres del Carbón, el diputáu nel Congresu por Madrid y secretariu de les Rellaciones cola Sociedá Civil de Podemos Rafael Mayoral y la diputada nel Congresu por Lleón Ana Marcello, amás de Torres y Castañón, eurodiputada y parllamentaria por Asturies, de manera respeutiva. “Nos titulares de los periódicos dizse una cosa” y llueu “omiten trabayar nel senu de la Xunión Europea, que ye onde hai que defender la continuidá del sector mientres se fai una transición sostenida nes zones mineres, que garantice l’emplegu y la posibilidá vital de las personas qu’ellí habiten”, llamentó.

La pixueta Torres, pela so parte, aseguró que Podemos reclamará una auditoría de les ayudes “dende les instancies europees pa conocer ónde foron a parar los más de 20.000 millones d’euros n’ayudes nos diferentes planes de la minería, porque’l dineru marafundióse y dexaron a too un sector y a les zonas onde taba implantáu ensin futuru nengún; ensin alternativa”.

Na semeya, Piernavieja a la derecha con dalgunos de los participantes asturianos nes xornaes.

Contador Estadistiques