Píden-y al Gobiernu qu’apare la obra de la berguería del Meicín

La plataforma qu'enxerta a les principales organizaciones ecoloxistes en dfensa de Pinubina presentó un escritu en rexistru de la Conseyería esixendo qu'apare la obra de construcción del agospiu nos montes de L.lena por carecer de los permisos precisos.

Colectivu Montañeru pola Defensa de los Picos d'Europa, Coordinadora Ecoloxista d'Asturies, Asociación Asturiana d'Amigos de la Naturaleza (ANA) y Coordinadora Ornitolóxica d'Asturies (COA) formen la plataforma que ta acabante de pidí-y a la Conseyería de Cultura que nun siga la obra de construcción del edificiu que va sustituyir l'antiguu refuxu de monte del Meicín, na fastera de Pinubina (L.lena)

Les organizaciones remembren que la costrucción del refuxu nuevu yá sufrió cuatro paralizaciones derivaes d'irregularidaes ambientales y urbanístiques a lo llargo de los trés años últimos, teniendo'l proyectu'l pesu de más de 1.000 alegaciones contraries a la so realización y la refuga de la Comisión d'Urbanismu y Ordenación del Territoriu d'Asturies (CUOTA ) a la penúltima versión que se presentó del mesmu, ello mientres que la última versión nin siquiera tien el preste o la negativa d'esti organismu en cuantes que, según denuncia la plataforma, la obra del Meicín, qu'entamó'l mes de setiembre, ta faciéndose ensin nengún de los permisos obligatorios.

La construcción d'una pista nueva pa llegar hasta'l refuxu con 2,5 metros d'anchu que nun figura en proyectu nengún y el derribu del refuxu vieyu son les obres que s'entamaron hasta agora, damvbes al paecer de la plataforma ensin tener nengún de los permisos obligatorios nin pasar los trámites imprescindibles como la declaración d'impactu ambiental del proyectu, que s'asitia nuna zona de monte virxe hasta agora de gran importancia mediuambiental pa delles especies, ente elles l'osu. Por too ello, la plataforma pide que se cumpla'l Real Decretu 1302/1986 d'Evaluación d'Impactu Ambiental, que manda nel so artículu 28 que "Si un proyecto de los sometíos obligatoriamente al procedimientu d'Evaluación d'Impactu Ambiental s'entamare ensin el cumplimientu d'esti requisitu suspenderase la so execución"