Piden que nun se-y dea'l preste a un campu de golf en Ribedeva

La Coordinadora Ecoloxista d'Asturies presentó alegaciones énte'l Conceyu de Ribedeva dientro del trámite d'información pública pol proyectu pa construyir en La Matavieja, en parroquia de Colombres, un campu de Golf, proyectu que lleva alantre la promotora Brañas Golf S.L.

La organización conservacionista diz que'l proyectu que quier llevase alantre nesti llugar del oriente asturianu ye "ún mas de los complexos turísticos y urbanísticos que se quieren asitiar n'Asturies mazcaritándolos de campu de golf". La organización denuncia lo que camienta que va ser "un pelotazu urbanísticu nel que van mercase e terrenos agrícoles pa recalificalos y vendelos como urbanización de luxu pa segunda residencia". Los ecoloxistes proyecten sobre'l futuru les consecuencies de l'actuación en casu de llevase alantre y adelanten que, de facese los xalés, estos van ser "un marafundiu pal Conceyu, que va tener ellí a unos vecinos que nun van pagar impuestos pero que van precisar de servicios".

Nes sos alegaciones, la Coordinadora diz que de dase'l preste al campu, ello diría contra la lletra de los oxetivos xenerales del planeamientu urbanísticu del Decretu 1/2004 que fala de "afalar la conservación de les formes tradicionales d'asentamientos de la población nel territoriu" un mandáu que pal grupu ecoloxista nun casa col enfotu "mercantilista y especulativu" que ta tres del proyectu , al que rellaciona con modelos d'urbanización y poblamientu que s'espardieron pela costa mediterránea española a lo llargo del pasáu sieglu y que se persabe que son "insostenibles". El colectivu demanda tamién que s'informe si los promotores presentaron informe mediuambiental acompañando los planos, como s'apauta na Directiva 2001/42.

El choque estéticu ente les viviendes arreyaes al complexu de golf y les de la so rodiada rural y agrícola en que va asitiase ye ún de los impactos que preve la Coordinadora y polos que se-y pide al Conceyu de Ribedeva que se retire'l proyectu, pero a los ecoloxistes abúlta-yos que'l campu de golf y la urbanización arreyada al mesmu van causar un impactu nel ordenamientu urbanísticu y nel consumu de recursos polos que va competir col mediu rural, sobremanera l'agua, un elementu que ta sometiéndose agora a planes d'aforru y mengua del gastu nos conceyos de la costa oriental asturiana.