Piden protección pa un monumentu medieval

La ruina de l'antigua ilesia de San Pedro de La Collá, nel conceyu de Siero ye lo único que nos queda anguaño d'un templu del que se tien anuncia per primer vegada nel testamentu del rei Ordoñu II, del añu 921. D'estilu románicu, San Pedro de la Collá remocicose bien de vegaes, recoyendo los estilos nuevos de los más de mil años d'historia que pasaron per ella, pero foi cola guerra civil que la ilesia esbarrumbó y los vecinos treslladaron el cultu a la ilesia nueva, naparte baxa del pueblu.

Güei, San Pedro de La Collá ye una llaceria que namás caltién les sos muries primitives, pero la cadarma del edificiu ta desaniciándose, y abondos detalles de la so construcción desapaecieron yá dafechu. Les llábanes del suelu que nun falten tán cambiaes de sitiu y la pila bautismal, que yera de cuando la fundación de la ilesia, destruyose de recién.

Sicasí, enfrente la ilesia sigue llantáu l'antiguu texu, un árbol simbólicu que se supón que ye más vieyu que'l mesmu templu.

La Tertulia Cultural El Garrapiellu, xunta los vecinos, solicitaron-yos nel añu 1993 a los responsables de la Conseyería de Cultura d'Asturies la igua la ilesia, amás d'amesta-y al texu una categoría de proteición pa esti exemplar tan notable. Agora que ta p'acabar l'añu 2002 continúa'l desaniciu de dambos monumentos, víctimes del desdexamientu burocráticu. Cola llei del Patrimoniu acabante de dase de pasu na Xunta Xeneral del Principáu, los miembros de la xixonesa Tertulia Cultural el Garrapiellu camienten que ye urxente un plan de proteición y igua de la ilesia y el texu que l'acompaña, motivu pol qu'esti domingu 15 a les 12 la mañana, la xente d'El Garrapiellu tien preparáu un homenax al Texu y la Ilesia de San Pedro