Piden otru reglamentu de turismu rural

El Principáu considera que'l turismu aguanta "fuerte y estable" sigún los datos del anális de la coyuntura turística d'Asturies ellaboraos pol SITA (Sistema d'información turística del Principáu d'Asturies) qu'afirmen que la tasa d'ocupación hotelera nel primer semestre del añu espoxigó 0,3 puntos sobre l'añu pasáu, con una media anual d'ocupación ente hoteles y establecimientos de turismu rural del 30,9 por cientu, cifra superior a la del añu 2001. Sicasí, la pallabra del director de Comerciu y Turismu Javier de la Ballina, parez que nun la creen muncho los empresarios dedicaos al turismu rural, un sector en que denuncien que tan cayendo los índices d'ocupación, entamando una fonda crisis económica pola falta d'un apueste seriu por ello, porque tan abriéndose más negocios de los que'l mercáu pue asumir y porque amás el Principáu quier imponé-y una nueva reglamentación que tienen mieu de que vaya a servir p'afalar l'apertura de grandes instalaciones hoteleres nel mediu rural, esfarraplando'l conceptu de turismu rural, qu'entienden que tien de dir xunta'l de desarrollu sostenible. La Federación Asturiana de Turismu Rural yá ta repartiendo fueyes pa pañar firmes contra esti reglamentu que-yos abulta un ataque a los sos negocios y al mediu rural en xeneral. La crítica xeneral al reglamentu ye que mira más pola apertura masiva d'establecimientos que por afitar un control de calidá del serviciu, pero tamién hai aspectos concretos que nun presten un res. Por poner un casu, el presidente de l'Asociación d'Apartamentos Rurales (ARAS) Carlos Nava solliñó'l fechu de que la Llei nun obliga a los propietarios d'establecimientos rurales a residir, nin siquiera a empadronase, nel conceyu onde trabayen, colo que los que se beneficiaríen del negociu nun seríen los que-y dan vida al mediu en que s'enxerta.

Contador Estadistiques