Pesca Marítima va soltar 12.000 xuveniles d'oriciu na sablera de Campieḷḷos

|
Oricios reducida

Tamién van repoblase les ríes del Eo y de Villaviciosa con amasueles estos meses.

La Conseyería de Desarrollu Rural y Recursos Naturales, al traviés de la Direición Xeneral de Pesca Marítima, va soltar mañana 12.000 xuveniles d’oriciu (Paracentrotus lividus) d’un añu d’edá y de 10 a 25 milímetros de diámetru, na playa de Campieḷḷos, en Cadavéu (Valdés). Los exemplares proceden del Centru d’Esperimentación Pesquera de Castropol (CEP).

Nel 2015 y 2017 yá se fixeren repoblaciones en zones submareales de Ḷḷuarca y Cuideiru, una actuación que se reforció cola introducción previa d’individuos adultos pa la proteición y abellugu de los xuveniles. Nel 2018 soltáronse 20.000 exemplares en zones intermareales, de los que 12.000 foron tamién pa Campieḷḷos.

Nestes árees notóse un efectu favorable pal asentamientu de los equinodermos. Una resolución de la conseyería del 5 de setiembre del 2016 estableció, tanto pa mariscadores profesionales como recreativos, una veda de dos años pa la estraición d’esta especie, prorrogada depués hasta avientu d’anguaño.

Un millón de Ruditapes decussatus

Dende Pesca Marítima tamién va repoblar, con un millón de xuveniles d’amasuela fina (Ruditapes decussatus), les ríes del Eo y de Villaviciosa nes baxamares de les marees vives de xunu y xunetu. Estos exemplares proceden tamién del criaderu del CEP de Castropol.

La lliberación va facese de forma progresiva, de la que vaigan algamando la talla de sema de 8 a 12 milímetros. Nel 2017 yá se soltaren 200.000 exemplares, y l'añu pasáu, 800.000.

El CEP dispón d’un stock d’un millón de xuveniles d’amasuela babosa (Venerupis corrugata) en fase de preengorde, que van soltase na Ría del Eo ente’l 2019 y el 2020, de la que vaigan algamando la talla de sema. La conseyería cumple asina col programa de caltenimientu y potenciación de los recursos pesqueros.

Contador Estadistiques