Perres públiques a la memoria de Franco

L'escándalu ta acabante de descubrise nel Congresu de los Diputaos gracies a una pregunta del diputáu d'Iniciativa Per Catalunya - Verds Joan Saura: ¿Por qué el Gobiernu del estáu subvenciona a la Fundación Francisco Franco con 41.000 euros (6.800.000 pesetes)? L'anunciu oficial d'esta subvención apaeció nel BOE del 21 d'agostu, qu'espeya una partida de 23.000 euros pa contratación de personal y otros 18.000 pa mercar equipos informáticos, too ello dientro'l proyectu de dixitalización y organización del archivu de la Fundación, que tien 27.000 documentos. El diputáu catalán quier cola so pregunta que'l Ministeriu de Cultura xustifique por qué se dan estes perres a una Fundación que tien ente los sos oxetivos "Esparder el conocimientu e Francisco Franco nes sos dimensiones humana, política y militar, asina como de los llogros y realizaciones algamaes pol so Réxime políticu" "Desarrollu d'actos conmemorativos ente los que rescamplen la celebración del 20 de Payares y la constante ofrenda floral nes tumbes de Franco y José Antonio nel Valle de los Caídos" y la "Emisión de Medalles Conmemoratives pa los cabudaños de la muerte del Caudillu con motivos variaos, n'oru, plata y bronce". Pa más aquello, la fía del dictador,Carmen Franco, ye la presidenta d'esta Fundación que defende la "lexitimidá del Alzamientu del 36" Arriendes de la inmoralidá que pal diputáu catalán ye'l da-y perres a una Fundación que trabaya con estos principios y que ta remanada pola familia directa del dictador, hai tamién un agraviu comparativu en cuantes que la Fundación Francisco Franco ye la que más tayada lleva del repartu ministerial, arramplando col 10% del total de subvenciones que se dieron pa proyectos archivísticos. La cosa vien de vieyo, porque a la Fundación yá-y dieron otru tantu nes subvenciones del añu 2001