"Perreríes" axunta los relatos más premiaos de Pablo Rodríguez Medina

La casa editorial Suburbia Ediciones presenta esta selmana "Perreríes" un llibru qu'axunta, por primera vegada, nueve de los más premiaos cuentos del autor entreguín Pablo Rodríguez Medina correxíos y prologaos pol propiu autor. Los relatos abarquen un ampliu campu temáticu, desde la fantasía sucia del "Perreríes" que-y da títulu al volume hasta'l puru costumbrismu en cuentos como El Plan (Friends forever). En pallabres del propiu autor "Quien llea esti volume decataráse de que de fondu tolos cuentos tienen una mesma actitú: la de que'l llabor d'escritor sigue siendo, n'esencia, dar testimoniu de sigo y d'una época -bona o mala-, la que mos toca en suerte vivir. Y facelo de la manera más guapa posible, y non siempre lo guapo ye lo bucólico"

Pablo Rodríguez Medina (L'Entregu 1978) ye ún de los escritores asturianos más reconocíos, autor de delles obres tanto en llingua asturiana como en castellán. Foi ganador nel añu 2001 del premiu Xosefa Xovellanos de novela con L'arna de San Atanás, y del Asturies Xoven de poesía con Los desconocedores del agua. De la so obra n'asturianu tamién destaquen Los paraísos perdíos (2000) Nun blinquen ayalgues (2003) y les noveles Les vueltes toles vueltes (2002) y Los taraos. Tien dellos llibros de poesía ( El color de l'ausencia, Nel dialectu del grisú, Tiempu d'esiliu y povisa ayeno). En teatru ganó'l Asturies Xoven con Martema. Historia de una guerra, retratu d'unes culpes y el premiu de tratru de l'Academia de la Llingua Asturiana con Orbaya.