Permitida la sema de pataques en tol país

La midida va entrar a valir nos díes próximos, cuando s'espublice nel BOPA, tres el desaniciu de la poliya guatemaliana nel territoriu.

La falta de captures d'esta especie invasora nos dos años últimos na rede de trampéu instalada permiten el llevantamientu de la sema de pataques en tol país. San Tiso d'Abres, A Veiga, Castropol, Cuideiru, Navia, Pravia, Taramundi y Valdés queden como zones tampón, lo que significa que se pue trabayar esti tubérculu, anque los agricultores han de notificar les sos plantaciones pa que se pueda facer un siguimientu fitosanitariu afayadizu y actuar con rapidez énte la posible apaición de dalgún rebrote de la plaga.

Les personas interesaes en semar nestos conceyos han de notificalo nel corréu electrónico declaracionpatata2021@asturias.org. El Gobiernu habilita esta direición pa facilitar la xera a los llabradores y llendar al máximu la movilidá y la concentración de persones nes oficines de zona.

Otra manera, les 600 trampes colocaes nos territorios tampón y nos que faen llende con éstos van caltenese y axustase pa siguir monitorizando la posible presencia de la poliya guatemaliana. Esta especie, que provoca dañu nes pataques cuando la so gata s’alimenta del tubérculu faciendo galeríes, tanto en campu como n’almacén, detectóse nel 2016 en Galicia y Asturies, lo que llevó a prohibir la so sema en dalgunes zones.

Na semeya, pataca afeutada pola poliya guatemaliana.