Permítense les romeríes, anque en condiciones complicaes pa les comisiones de fiestes

Podrá haber romeríes esti branu, pero les condiciones que marca la Conseyería de Salú dificulta la organización por parte de les comisiones de fiestes al tener que perimetrar les zones p’acoyer a más de 1.000 persones. La flexibilización nueva de midíes, qu’entren a valir esti vienres, permite al ociu nocherniegu abrir hasta les 3.

“Tamos nuna situación de riesgu que vien oscilando del nivel 1 al nivel 2”, esplicó Rafael Cofiño, direutor xeneral de Salú Pública, qu’aseguró que “ye posible que tengamos una situación de meseta de la incidencia tol branu”, agora asitiada en 71 casos cada 100.000 habitantes a 14 díes. “L’horizonte ye optimista, tamos posiblemente nuna situación de recta final, pero ye mui importante nun perder la concentración y baxar la concentración”, alertó darréu al siguir entovía “en riesgu” a la espera del avance de la vacunación.

Dau’l momentu epidemiolóxicu, dende Salú dan el pasu de flexibilizar les restricciones actuales, “un paquete de midíes necesaries, adecuaes y proporcionales a la situación”, en coherencia col documentu d’actuaciones coordinaes que plantega’l Ministeriu de Sanidá. A falta de la so espublización nel BOPA, van entrar a valir esta medianueche.

10 persones en terraces

Miguel Ángel Prieto, xefe d’Alertes y Emerxencies Sanitaries COVID-19, encargóse d’anunciar les novedaes llueu d’insistir na necesidá de proteición individual de la ciudadanía. Les principales son l’aumentu de 6 a 10 persones n’esteriores –n’interiores les meses siguen siendo de 6–, l’apertura a les 3 hores pal ociu nocherniegu y la posibilidá d’entamar eventos de gran afluencia de xente: aforos de 2.500 n’interiores y de 5.000 n’esteriores.

D’esta forma, va ser posible organizar romeríes, anque Prieto especificó que si les actividaes “tuvieren más de 1.000 asistentes obligaríase a que tuvieren sectorizáu pa cada 1.000 persones de manera que tuvieren los sos fluxos d’entrada y salida correspondientes y los sos servicios independientes”. Unes condiciones que va dificular a les comisiones de les fiestes de prau más populares la recuperación de les sos celebraciones esti branu.

La hostelería, mentes, va siguir abriendo hasta la 1 y va poder usar la barra pa servir, pero nunca pa consumir. D’igual fomar, puntualizó que les condiciones pa los chigres nocherniegos son les mesmes que pa los diurnos y que les pistes de baille van siguir zarraes.

Na semeya, Prieto y Cofiño.