Perlora va contar con 90 places d'aparcamientu más na zona d'entrada

La Ciudá de Vacaciones prepárase pal branu.

Nes selmanes próximes van principiar les obres p'adaptar una zona asitiada a la entrada del complexu de Perlora como aparcamientu p'aumentar mientres el branu les places d’estacionamientu que se ponen a disposición de los usuarios. D'esta forma, les persones que quieran facer usu del recintu va contar con 90 places más d'aparcamientu.

L'añu pasáu púnxose en marcha un sistema pa regular l'accesu a la Ciudá de Vacaciones asitiada nesta población de Carreño. Dende xunetu una barrera impide'l pasu a más vehículos cuando se completen los 500 estacionamientos disponibles dientro'l recintu, polo que los visitantes han d'usar los habilitaes nel esterior, dalgo más de mediu millar.

Acondicionamientu

El Gobiernu tamién va ameyorar el moblame de les árees recreatives, del parque infantil y de les instalaciones deportives. Mesmo estes actuaciones como l’habilitación del aparcamientu provisional cuenten con un presupuestu de llicitación de 49.888 euros y un plazu d'execución d'un mes.

Amás, intensificóse, como se vien faciendo nos últimos años, los llabores de caltenimientu de la ciudá residencial énte l'entamu de la temporada braniega. Asina, nos últimos díes reforzáronse los trabayos de siega nes zones verdes y d'acondicionamientu de les árees recreatives, de la qu'empezaba a funcionar el nuevu contratu de caltenimientu del complexu, que s'axudicó por un importe de 108.887 euros y una vixencia de 19 meses.

El nuevu serviciu contempla una medra na frecuencia de les xeres de siega y tamién na llimpieza de les zones d'aséu y na recoyida de basura, que se van intensificar entá más nel branu.