Periodistes pol Asturianu presénta-yos a los partíos el so posicionamientu sobre presencia del asturianu na TV autonómica

Periodistes pol Asturianu va entamar una rueda d'entrevistes con representantes políticos y responsables del Ente Públicu de Comunicación pa presenta-yos la so propuesta sobre la presencia de la llingua asturiana na canal autonómica. El colectivu de profesionales ta acabante d'ellaborar un documentu nel que s'espón la necesidá de que l'asturianu tenga presencia digna na tv, na radio y el mediu dixital que se prevé qu'echen a andar en setiembre.

Nel documentu, abórdense cuestiones como la capacidá de normalización llingüística de los medios audiovisuales, indicando que nun se pue desaprovechar la oportunidá que brinda l'Ente Públicu de Comunicación pa la promoción de la llingua asturiana.

Nesti aspectu, fálase de la importancia del doblaxe, sobremanera no que cinca a la programación infantil. Periodistes pol Asturianu considera que'l trabayu nesta llinia da cobertura a una estaya fundamental de cara a la normalización, al par que fai un apueste pola industria propio, tanto de cara a productores audiovisuales como profesionales del arte dramáticu.


Amás, l'informe recueye tola lexislación na que se dicten los derechos y los deberes qu'amparen a les llingües minorizaes. Siguiendo la lletra del corpus xurídicu, interprétase que l'asturianu, en cuantes que llingua minorizada, ha tener reconocíos los mesmos derechos que'l restu d'idiomes, siendo l'Ente Públicu de Comunicación vehículu afayadizu pa facelos efectivos.

Nel testu faise un repasu históricu pola presencia del asturianu nos medios de comunicación, amuesando que nun se ta proponiendo dalgo estraño, sinón dalgo que foi y que ye una realidá. Al par, tamién s'examina con procuru la presencia actual del asturianu nos medios de comunicación con difusión n'Asturies, poniendo de manifiestu que la mayor parte de les veces faise de manera puntual y mientres dure la subvención que da la Conseyería de Cultura.


Igualmente, recuéyense nel informe les experiencies de televisiones autonómiques en territorios con llingua propia, tanto nel estáu español como na Unión Europea. ETB 1, la Corporació Catalana de Ràdio i Televisió, la Televisión de Galicia o Punt Dos en Valencia espeyen cómo la normalización de la llingua ye ún de los oxetivos colos que nacen estes canales. N'Europa, repítese'l fenómenu: el País Galés, Irlanda, Escocia, Holanda, Alemaña, Bélxica, Dinamarca, Finlandia, Noruega, Francia, Grecia y Italia son dalgunos casos que se citen nel informe.

A traviés de too ello, Periodistes pol Asturianu quier recordar a políticos y responsables del Ente Públicu de Comunicación la necesidá de qu'ésti nun dexe pasar una de les cuestiones qu'habíen de ser básiques na so puesta en marcha: la normalización del asturianu.

El calandariu de reuniones colos grupos parlamentarios representaos na Xunta Xeneral entama'l prósimu martes 14 a les 14 hores con Diana Camafeita, diputada d'IX-BA na Xunta Xeneral y sigue'l xueves 16 con Ovidio Sánchez, presidente del PP d'Asturies.