Pepe Fueyo: “Ye bien prestoso ver xente y cultures distintes entemecese ente sí y faer una mecigaya”

Skanda foi’l representante asturianu na estaya ‘Palco Ibérico’ del Festival Internacional Máscara Ibérica. Pepe Fueyo, guitarra acústica y voz, repasó con Asturies.com les sensaciones que despertó nel grupu la so presencia nel certame lisboeta.

¿Qué tal foi la esperiencia de tocar na Praça de Rossio de Lisboa?

La plaza ye grande, guapa, taba enllena xente con ganes de pásalo bien, facía una nueche estupenda, l'equipu de soníu y los técnicos yeren correctos, y l'organización inmeyorable. La esperiencia foi perbona.

¿Yera la primer vegada que tocaben fuera de les llendes del Estáu?

Nel país vecín ye la tercer vegada que tocamos. El ‘CeltiRock’ de Montalegre y l’ Intercélticu de Sendim fueron les primeres y hai que dicir que siempre nos trataron de forma impecable. Tamién participamos nel Intercélticu de Lorient.

El conciertu taba enmarcáu dientro de la estaya ‘Palco Ibérico’ del Festival Internacional Máscara Ibérica (FIMI). ¿Qué impresión lleva d’esti certame?

En xeneral, la impresión ye positiva. Ye bien prestoso ver xente y cultures distintes entemecese ente si y faer una mecigaya como la que tuvimos ocasión de vivir en Lisboa. El cénit del festival ye ensin dulda el desfile, colorista, poliétnicu y gayoleru onde los haya. Fizo escaecer a la xente, anque fora per un momentu, la situación que tamos viviendo.

¿Qué supón p’Asturies la participación de mazcaraes, grupos musicales y inclusive cocineros nesti eventu?

Ta nidio que ye un espeyu nel que te ve tol mundo. Concretamente los nuesos discos colaron escontra Xapón, Arxentina, Italia, Reinu Xuníu... Al Ferrari de Los Sidros ficieron-y más semeyes qu’al de Alonso. Hai xente que si non fora por esti festival, nin siquier sabría qu'Asturies esiste.

¿Cree necesaria una presencia institucional mayor nel festival?

La presencia del nuesu Gobiernu sería un emburrie importante. Munches instituciones nun se dan cuenta que nestos eventos damos a conocer la nuesa tierra al resto del mundu. Munchos queden encantaos y con ganes de venir.

El problema de la presencia del Gobiernu ye qu’ implica qu'unos cuantos fartones profesionales van llevar la mayor parte les perres, les semeyes de la prensa y el prestíu de faer un actu altruista que beneficia a Asturies. Y lo peor de todo ye que la mayoría de la xente va a creelos.

¿En qué tán trabayando anguaño?

Agora tamos preparando'l que va ser el nuesu primer discu en directo. Una revisión n'acústicu de la nuesa  carrera.

¿Ónde vamos poder ver a Skanda en feches próximes?

Vamos tar el 14 de xunu nes fiestes de Caborana, y la selmana siguiente, el 21 de xunu, en Mieres, nes fiestes de San Xuan.