Peligra la Ría d'Avilés

Delles asociaciones ecolosistes y conservacionistes como'l Colectivu Ecoloxista d'Avilés y el Grupu d'Ornitoloxía Mavea, tan preparando alegaciones contra l'enanchao de los cais de los Astilleros "Ría de Avilés, S.A." que tendría de facese a costa de la charca de Zeluán, declarada Monumentu Natural va poco pol Principáu. A les organizaciones ecoloxistes abúlta-yos qu'esti proyectu va menguar una migaya más lo poco que-y queda de natural a la Ría d'Avilés, que va yá dos años, de la que s'enanchó la Curva de Pachico llevó un taragañazu col que perdió 3 hectaries de superficie, y qu'agora podría perder otres cuatro con esti nuevu proyectu. La Ría de Avilés, qu'estos díes ta entamando'l procesu pa quitar d'ella tola basa contaminao que dexaron nella Ensidesa y otres industries, ye, con too y con ello, un llugar d'importante diversidá biolóxica pel que pasen hasta 4.000 páxaros tolos díes y qu'inclúi la Charca de Zeluán, declarada Monumentu Natural pol Gobiernu asturianu . Nes alegaciones los ecoloxistes remembren, aparte de la importancia que tien pa los páxaros, que la parte que se quier dexar pa la industria ye l'únicu sitiu de la mesma en que s'atopen el Pholas dactylus y el Ligia oceanica, dos moluscos bien raros de ver. Les organizaciones faen un llamáu a mandar alegaciones contra'l recrecío de los astilleros a títulu particular, ufiertando modelos d'alegación que puen pidise al Grupu Mavea nel separtáu de correos 385, 33480 d'Avilés.