Pelayo Sánchez supera a Alaphilippe nel esprín pa ganar la etapa del Giro

En Rapolano Terme, na Toscana, Pelayo Sánchez (Movistar) presentóse como un ciclista de futuru nel pelotón profesional. El de Teyego, con 24 años recién cumplíos, fíxose grande frente a un corredor de la trayeutoria del francés Jualian Alaphilippe (Soudal Quick-Step) pa ganar la sesta etapa del Giro d’Italia.

Nuna xornada especial, con dos puertos de cuarta categoría y trés tramos de ‘strade bianche’, esto ye, carreteres de grava, 11,6 quilómetros en total concentraos nel tramu final, Sánchez daba un trunfu al ciclismu asturianu na gran vuelta italiana 24 años depués. Foi’l xixonés Chechu Rubiera, na so etapa nel Kelme-Costa Blanca, l’últimu en llevantar los brazos al cielu nel Giro, nos Dolomites, allá pel 2000.

El de La Ribera tamién ganó a lo grande. Xunto con otros cinco compañeros alcanzó a falta de poco más de 80 quilómetros a los ciclistes qu’escaparen 20 enantes: Alaphilippe y l’italianu Filippo Fiorelli (VF Group Bardiani-CSF Faizanè).

Sería la fuga bona de xornada y completábenla los australianos Kaden Groves (Alpecin-Deceuninck) y Lucas Plapp (Jayco AlUla) y los italianos Matteo Trentin (Tudor) y Andrea Vendrame (Decathlon AG2R La Mondiale). Un total de siete ciclistes que querían llevar la victoria en Rapolano Terme y que llegaron a tener más de 3 minutos de ventaya col pelotón

Tramos de grava

A falta de 34 quilómetros pa la meta, pasando pelos tramos de grava, Sánchez, Alaphippe y Plapp llograben sacar distancia a los sos compañeros de fuga. Del últimu, con 11 quilómetros per delantre, contaben con 1 minutu y 4 segudos col pelotón, que yá apretaba.

L’asturianu, consciente de la oportunidá, atacaría a falta de 4 quilómetros, ensin ésitu. Quedaría-y la opción del esprín.

Col peligru de ser atrapaos llegaron los trés escapaos al quilómetru últimu, en concreto 21 segundos de ventaya. Sánchez colocóse na cola del grupu, esperando’l so momentu, que llegó cuando arrancó Alaphilippe a unos 200 metros.

Saltaría a la so caza’l de Teyego, pa superalu con suficiencia nun esprín nel que Plappa namái pudo ser espectador. Consiguía asina l’asturianu’l so tercer trunfu nel circuitu profesional depués de la d’Uviéu na Vuelta a Asturies del añu pasáu y la de xineru nel Trofeo Pollença-Port d’Andratx.

Na semeya, Sánchez lleva la mano a la cabeza al pasar la llinia de meta con Alaphilippe baxando la cabeza depués d'un gran esfuerzu y Plapp detrás.