Paz per San Xuan, paz pa tol añu

Cientes de fogueres van prender n’Asturies na medianueche del xueves pa celebrar San Xuan. La nueche más máxica del añu, na que'l fueu y l'agua son protagonistes, ufre munches opciones per tol país.

La mayoría de ciudaes y pueblos d'Asturies –al igual que munchos munchos barrios– tienen preparaes pa esta nueche fogueres pa celebrar el solsticiu de branu –realmente foi’l día 20, pero la Ilesia católica treslladó esta celebración pagana pa coincir con San Xuan Bautista– y quemar los augurios malos. Esta tradición de raigaños celtes que recibía’l nome d’Alban Heruin y na que se fai cultu al sol y al agua al traviés del engalanamientu de fontes, ta entovía mui viva nel país.

Amás ye l’únicu momentu d’atopar la flor d’agua, que sal per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

La foguera más multitudinaria ye la qu’entama’l Conceyu de Xixón na sablera d’El Natahoyo, qu’esti añu va contar cola presencia de les bandes de gaites Noega y Villa de Xixón. La celebración principia a les 21 hores col enrramáu de la fonte de Pelayo por parte d’Andecha de Cultura Tradiciona Na Señardá. A la medianueche, tres el prendíu de la foguera, va tener llugar la danza prima y el llanzamientu de fueos artificiales. Otros barrios de la ciudá, como Ciares, Cimavilla o La Calzada en L’Arbeyal, tamién celebren esta nueche máxica nun ambiente más vecinal.

Una cita clásica ye de la Corvera, en Tresona, la nomada 'Foguera d'Asturies', qu'esti añu da un xiru y allóñase de la tradición al incorporar una orquesta y caltener la fiesta de música electrónica. La folixa va principiar a les 22.30 hores cola actuación de Cerezal, pa depués dar pasu a un espectáculu de Producciones Nun Tris, de nome ‘La quema', y la Banda de Gaites de Corvera d'Asturies. Tres el prendíu d’una foguera especial a medianueche, la celebración va continuar con un 'Conciertu a Belenos' con Rodrigo Cuevas y la orquesta Cuarta Calle.

Mieres, mentes, celebra les sos fiestes de San Xuan, y Uviéu entama la foguera otru añu onde la Catedral, nesta ocasión con un homenaxe a Miguel de Cervantes cola actuación de los grupos de teatru Margen y l'aragonés K de Calle, pa depués dar pasu a los grupos folklóricos Trasgu, Fitoria y Inmaculada. En L'Entregu, el Centru Social Autoxetionáu La Semiente organiza un añu más la foguera nel prau xunto al campu de fútbol y una queimada popular.

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ actualizáu cola incorporación de refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa. Tamién van poder disfrutar del cuentu 'L'encantamientu' que se desendolca en San Xuan.