Patronal de supermercaos y sindicatos algamen un principiu d'alcuerdu

Los trabayadores, que foron a la fuelga los díes previos a la Navidá, algamen parte de les sos reivindicaciones na negociación.

La robla del Conveniu del Comerciu Minorista del Principáu d'Asturies, que tendría vigor hasta'l 2023, ta cerca de producise tres el principiu d'alcuerdu ente la patronal de supermercaos, Asupa, y los sindicatos CC OO, UXT y USO. El día 13 retomáronse les negociaciones depués de que se desconvocaren el segundu tramu de paros previstos pal 28 d'avientu, ensin avances nun primer momentu.

Col pasu de los díes la patronal ufiertaba "en cuanto a los salarios, una xuba del 1,5 por cientu nel 2019; 2,15 por cientu nel 2020; 2,53 por cientu nel 2021; y 2,5 por cientu más l'IPC nel 2022 y nel 2023; dos díes más de vacaciones; otros seis díes de permiso de llactancia –de 11 a 17–; y alcuerdu de subrogación nel casu de cambios de grupos, como yá padecieron, por exemplu, los antiguos trabajadores d'El Árbol". Depués de les conversaciones últimes, "habrá un día más de llibre disposición que nun coincida con Navidaes; que'l trabayador pueda escoyer ente festivos compensaos con descansos –como hasta agora– o pagaos; los permisos remuneraos, como por fallecimientu, computarán dende'l primer día llaborable; y el compromisu de crear una comisión de trabayu con feches marcaes, pa evitar asina que la negociación del conveniu siguiente entame tarde y s'enquiste", enumera Manuel Suárez, responsable de sector de minoristes de FS-USO-Asturies.

El sindicalista considera que "ye un bon alcuerdo. Magar nun consiguir nesti conveniu toles nueses reivindicaciones, sí algamamos delles y llogramos otres diferentes. Yera'l momentu de zarrar el conflictu, yá qu'una fuelga nesti sector supón munchu esfuerciu por parte de tola plantía". Les dos cuestiones que demandaben los trabayadores que queden fuera del alcuerdu son la xuba de categoría por antigüedá y la pausa de venti minutos retribuyida pal pinchu.

Na semeya, un momentu de l'asamblea de trabayadores celebrada ayeri polos sindicatos pa comunicar el resultáu de la negociación.