Patrimoniu da-y el preste al desanicie de Cellagú

El Plenu del Conseyu de Patrimoniu del Principáu d'Asturies firmó ayeri la descatalogación patrimonial de los restos del Castiellu de Cellagú, en Conceyu d'Uviéu, una decisión que prende la luz verde al enanchamientu de la cantera que tien la emprea Readymix Asland atiestando col castru de la edá del fierro. La única pega que punxo'l Conseyu de Patrimoniu al desanicie del castru ye qu'esti organismu controle'l llabor de desmonte de les estructures más importantes del castru, que van asitiase nun aula d'interpretación en Llatores, nuna finca que cedió'l Conceyu d'Uviéu

Los miembros del Conseyu de Patrimoniu votaron mayoritariamente al favor del desmonte y treslláu de les estructures que queden del castru, y namás se rexistraron dos votos en contra, anque la sesión del Conseyu tuvo bien d'ausencies.

El castru de Cellagú supón l'exemplu d'arquitectura castreña más importante del conceyu d'Uviéu. Con ser ún de los meyor estudiaos y documentaos, el de Cellagú ye tamién ún de los ataques al patrimoniu asturianu más llaceriosos que se conoce.

Asitiáu nun altu nel valle del Ríu Gafo, al sur del conceyu d'Uviéu, Cellagú tuvo'l so aniciu nun pobláu indíxena prerromanu hacia'l sieglu V enantes de Cristo. Como munchos otros, el castru tuvo una posterior ocupación romana qu'entamó a mediaos del sieglu I. Les primeres escavaciones que se fexeron en Cellagú nel añu 1994 descubrieron la esistencia d'un complicáu conxuntu de muries defensives anteriores a la llegada de los romanos al castru que se siguieron enanchando en tiempu d'estos cola construcción d'un preciosu turruxón reondu y una segunda muria. Aquelles ecavaciones ayudaron a rescamplar la importancia d'un castru qu'ocupaba más d'once mil metros cuadraos y asoleyaron tamién restos d'actividá metalúrxica, alcontrándose talleres de fundición y bien de preseos y adornos metálicos, amás de cacía de cerámica.

Los arqueólogos rellacionaron siempre'l castru de Cellagú con otros otros de la redolada, y ye que dende Cellagú hai contactu visual con otros poblaos de tiempu prerromanu, mientres que'l llabor sobre los metales, nel que yeren especialistes los habitantes del pobláu marca l'aniciu de les mines de fierro del Aramo. Too ello, al empar que la construcciónde villes de tipu romanu na redolada del castru convierte Cellagú nun llugar pal que los historiadores albidren que tuvo un papel clave na fundación de la ciudá d'Uviéu.

Con tener una importancia tan grande, el Cellagú sufrió nos años 90 un procesu d'espoliu dignu de mención. Ello entama cuando nel 96 la empresa de cementos Readymix Asland, titular d'una cantera apegada al castru, espresa la so voluntá d'enanchar la esplotación minera, entamando un debate ente defensores y contrarios al castru y. En medio d'esti discutiniu, una nueche de 1997 un grupu de desconocíos entren al castru y esfarraplen con picos y con maces tolo qu'alcuentren, destruyéndolu dafechu. Por primer vegada, un castru foi portada de tolos periódicos asturianos, xenerando un debate social nel que quedó pa la historia la frase del diputáu Anton Saavedra, que definió'l castru como "un montón de piedres".

El pulsu decidióse a la fin al favor de la empresa, y anque la Real Academia de la Historia ellaborare un dictamen encamentando la conservación del castru, el Principáu optó por una decisión draconiana, aprebando nel añu 2002 el treslláu de los elementos del castru a un aula didáctica y la ocupación del llugar pola cantera. La decisión del Conseyu de Patromoniu d'ayeri da-y el preste a esta opción y pon l'últimu clavu na caxa d'esta pieza clave del patrimoniu asturianu.