Patricia Suárez: “Estos cursos son bonos pa prauticar l’asturianu; aprendes muncho”

Tres facer la preba de conocencia nel mes de mayu, Patricia Suárez Suárez (Xavita, 1982) decidió apuntase al cursu avanzáu de Llingua Asturiana de la UABRA. L’oxetivu d’esta profesora ye sacar el títulu d’Espertu.

¿Qué foi lo que-y llevó a facer el cursu avanzáu de Llingua Asturiana na UABRA?
 
Apuntéme porque soi profesora. Fixi Filoloxía Inglesa y agora toi con Maxisteriu, y la mio intención ye sacar el títulu d’Espertu, pa lo que tengo que tener l’avanzáu de Llingua Asturiana. Enantes, en mayu, presentéme a la preba de conocencia.
 
¿Qué tal ta siendo la esperiencia?
 
Mui bona. Nun toi internada, yá que toi al llau de casa, pero l’ambiente que se vive nos cursos ye mui bonu. Toi mui contenta.
 
¿Cómo ye’l día a día d’un escolín na UABRA?
 
Tenemos clases pela mañana y pela tarde. Son cuatro hores pela mañana, xintamos a les dos, y llueu tenemos llibre hasta la seis enantes de dar dos hores más, hasta les ocho.
 
Nel casu concretu del avanzáu, ¿qué materies dan en clase?
 
Lliteratura, historia d’Asturies, gramática, situaciones comunicatives orales y escrites… Facemos hasta poemes, cuentos y histories.
 
¿Recomendaría a otra persona qu’acudiera a estos cursos?
 
Sí, porque yo creo que tán mui bien. L’avanzáu ye un cursu bastante densu, nel qu’aprendes muncho, bonu pa prauticar l’asturianu y conocer xente que vien d’otros sitios y colos que pues compartir esperiencies. Paga la pena facelo.