Pastor fixa’l pal 13 de xunu l’alderique sobre la moción de censura a Rajoy de Podemos

“Ye insostenible tener un Gobiernu que ta atravesáu pola corrupción”, aseguró la diputada Sofía Fernández Castañón enantes d’intervenir en Llangréu nun alderique sobre la moción de censura presentada por Podemos. Ana Pastor fixó pal 13 de xunu la sesión na que se va tratar esta cuestión nel Congresu.

La parllamentaria asturiana de Podemos apuntó que la moción “ye ciudadana, porque tresciende lo que ye la propia organización federal d’Unidas Podemos-En Comú Podem-En Marea y lo que tamos diciendo ye que ye insostenible tener un Gobiernu que ta atravesáu pola corrupción”. Fernández Castañón fixo mención al recién escoyíu secretariu xeneral del PSOE, Pedro Sánchez Castejón, al qu’animó a sumase a la moción de censura: “Si atopamos responsabilidá inmediata, vamos tar pol llabor y pola xera porque lo qu’entendemos ye que nun podemos tener siguir teniendo un Gobiernu corruptu, que nun comparez, y que nun ta teniendo una dignidá que’l pueblu d’Asturies y el pueblu d’España en xeneral sí tien”.

Nesi sen, el secretariu d’Organización de Podemos, Pablo Echenique, aseguró ayeri que la formación morada taría dispuesta a retirar la so moción de censura nel casu de que’l PSOE presentara una propia y la fixera vidable. La de Podemos va aldericase finalmente’l 13 de xunu, según decisión de la presidenta del Congresu, Ana Pastor, dalgo que nun gustó al secretariu xeneral Pablo Iglesias, que recordó, que la última que se trató, nel añu 1987 al socialista Felipe González, tardó en debatise 3 díes dende’l so rexistru.