Parte de guerra galipoteru

A día d'ayeri, el vertederu de Cogersa llevaba recoyíes 1488 tonelaes de galipote, los centros de L.luarca y Avilés llevaben atendíos 533 páxaros petroliaos (316 d'ellos entovía con vida y a tratamientu). La marea negra taba dexando efectos graves a última hora de la tarde en 32 playes y pedreros, cebándose con Villaviciosa y Gozón, y pa los trabayos de llimpieza, el 112 llevaba repartíos 6.542 equipos, según datos oficiales apurríos pol Gobiernu asturianu.

El 112 ta acabante de recibir 5.000 equipos nuevos más, y a lo llargo del día de güei nun dexaron de llegar más páxaros a los centros d'atención, que caltién mayormente personal voluntario. Mientres, l'aire del sur ta llibrando de qu'entre más galipote, pero les grandes manches que taben enfrente la costa siguen ehí, y ye fácil que estes y les que tan entrando de la parte Galicia acaben na costa en cuantes l'aire se ponga a soplar pa contra la tierra. Si llegar lleguen, la mesma conseyera diz qu'habrá que preparase pa "lo peor".