Parres recibe a la Xira pola Oficialidá

Les Arriondes acueye esta selmana les actividaes d'esta campaña itinerante pa concienciar sobre la necesidá del reconocimientu llegal de les llingües del país.

Esta mañana entamó la parada de Parres de la Xira pola Oficialidá. Rosario Huelga, conceyala de Personal, Cultura y Dinamización Social, xunto con Carlos Rubiera, presidente del Patronatu de la Fundación Almastur, y Iván Llera, presidente d’Iniciativa pol Asturianu, les dos entidaes detrás d'esti proyeutu, inauguraron una selmana d'eventos sobre la importancia de protexer la llingua asturiana y defender la oficialidá que va contar con un homenaxe a los escritores del conceyu.

Yá tán abiertes al públicu les dos esposiciones, ‘Voces, una hestoria de la llingua asturiana’ y la de llibros básicos sobre l’asturianu qu’inclúi diccionarios, llibros de consulta y normativos, o traducciones al asturianu de grandes clásicos de la lliteratura, que recibieron les primeres visites escolares al meudía, y mañana ta programada la proyeición del documental 'De güeles a nietes. El retu de la tresmisión xeneracional del asturianu’, una producción d’Iniciativa pol Asturianu y Cuatro Gotes que compila testimonios de 15 persones de distintos ámbitos qu’analicen esti conceptu, dende les 19.30, horariu al que van empezar tolos eventos.

El miércoles, mentes, va visualizase, ‘El valir económicu d'una llingua’, otru audiovisual que, nesti casu, pretende concienciar sobre los beneficios que supondría la oficialidá de la llingua asturiana dando a conocer la esperiencia de diferentes empreses qu’usen l’asturianu nos sos productos o servicios. Na cuarta xornada de la Xira pola Oficialidá, el xueves, los parragueses van disfrutar d'un recital de poesía con Rubiera y Serxu Luaces Blanco, y na final, el vienres de la charra-coloquiu ‘¿Porqué sí a la oficialidá del asturianu?’, que va poner Inaciu Galán, miembru de númberu de l'Academia de la Llingua Asturiana.

Darréu, sobre les 20 hores, va entamase un reconocimientu a los escritores del conceyu por parte de la conceyala pa siguir con una actuación musical de gaita con Luaces Blanco y del cantante de tonada Rafael Díez Fernández. La selmana va pesllase cola llectura del 'Manifiestu pola oficialidá'.

Parres ye la quinta parada de la Xira pola Oficialidá, qu'arrancó en Bimenes n'abril del añu pasáu y que yá visitó nesti tiempu Samartín del Rei Aurelio, Villaviciosa y Mieres.

Na semeya, Rubiera, con un exemplar de la Biblia n'asturianu na mano, da una esplicación a los primeros escolinos que visitaron les esposiciones de la Xira pola Oficialidá.