Pancarta nel Tartiere pa esixir que l'autonómica emita n'asturianu

Una pancarta espurrida pola organización cívica Xunta Pola Defensa de la Llingua Asturiana esixó ayeri n’Estadiu Nuevu Carlos Tartiere d’Uviéu la emisión en llingua asturiana de la TV autonómica asturiana nel trescursu del partíu qu’enfrentó a Real Uviéu col Real Unión. La pancarta, de grandes dimensiones y col testu “La televisión asturiana na llingua asturiana” tomaba más de 15 metros d’ún de los fondos del estadiu uvieín, apaeciendo bien de vegaes nes pantalles de tolos televisores de los siguidores del equipu asturianu que teníen sintonizada la canal autonómica, inda en fase de prebes, y qu’ayeri tresmitió’l partíu del equipu carbayón en directo, partíu al qu'asistió amás el Presidente asturianu Vicente Álvarez Areces. Esta acción entamada ayeri pola organización de defensa del asturianu supón l’aniciu d’una campaña pa reivindicar la presencia de la llingua asturiana nes emisiones de la RTPA que va entamar la Xunta pola Defensa de la Llingua Asturiana y cola que se pretende apertar sobre la directiva del Ente Públicu y tamién sensibilizar a la sociedá asturiana sobre esta cuestión.