Palacios y otros tres activistes pasaron la nueche na embaxada del Estáu español n’Atenes

Rafael Palacios, Antón Gómez Reino, Elvira Souto (sindicalista) y Santiago Alba Rico (filósofu y escritor) pasaron la nueche na Embaxada del Estáu español n’Atenes. Protesten pola actitú pasiva del Gobiernu estatal ante la retención del ‘Gernika’.
 
Esti barcu forma parte de la Flota de la Llibertá que lleva ayuda humanitaria a Gaza y ta secuestráu por parte de les autoridaes griegues dende’l vienres. La embarcación mantiénse atracada nel cai de Kolymbari, na isla de Creta, de forma obligada por orde del Gobiernu griegu, lo que llevó a los activistes a viaxar hasta Atenes pa tresmitir les sos protestes al embaxador español na capital helena. Asina, ayeri, una ventena de persones que formen parte de la tripulación del ‘Gernika’ entraron nel edificiu de forma pacífica y colgaron d’un balcón la bandera de Palestina. Palacios, Goméz Reino, Souto y Alba tuvieron un alcuentru con Miguel Fuertes, l’embaxador, al que-y entregaron dos cartes, ún con destín a la ministra d’Asuntos Esteriores, Trinidad Jiménez.
 
Los activistes aseguraron que nun diben a movese de la Embaxada hasta que reciban una rempuesta de Jiménez y consiguieron el permisu de Fuertes de facer usu del antepar y d’un bañu esta nueche. De primeres, ayeri, tres conocer la noticia de la presencia d’estos activistes nel edificiu, Asuntos Esteriores fixo públicu un comunicáu nel que refuga les peticiones de los 40 persones que formen parte del ‘Gernika’ y aconseyaronlos pa qu’acepten la ufierta griega de que’l propiu país helenu llevara l’ayuda humanitaria a Gaza por vía terrestre en collaboración de la Organización de Naciones Xuníes (ONX).
 
La situación del ‘Gernika’ nun ye única, yá qu’un barcu canadiense con 30 tripulantes, ensin capitán, foi asaltáu por patrulleres griegues y obligáu a tornar a puertu. Namái una embarcación de les que formen parte de la Flota de la Llibertá, de bandera francesa, ta navegando n’agües internacionales en direición a Gaza.