Palacios declara que’l procesu de candidatura asturianista plural da pasos hacia la so fase final

N’ochobre entamó nel asturianismu un procesu con vistes a presentar una candidatura plural nes próximes elecciones. ASTURIES.COM quiso conocer los pasos que se tán dando y faló col portavoz del BA, Rafa Palacios, representante d’una de les organizaciones que formen parte d’esti procesu.

“Esperemos que puea entrar yá na fase final y temos en condiciones de presentalo enantes de qu’acabe esti añu”, comenta Rafa Palacios sobre la situación d’un procesu que, nes sos palabres, “entamó nel mes d’ochobre y nel que venimos falando dende distintos ámbitos del asturianismu, de la izquierda, de movimientos sociales, etc”.

En rellación colos anteriores alcuerdos que’l asturianismu políticu algamó en feches preelectorales, Palacios argumenta qu’agora la situación ye diferente porque “entamaron les conversaciones con tiempu”.

Propuesta abierta
Bloque por Asturies, UNA y independientes como l’ex diputáu d’Izquierda Xunida Francisco Javier García Valledor, son dalgunos de los nomes que declararon públicamente la so participación nesti procesu.

Sicasí, el portavoz del Bloque espón que “más importante que fuerces polítiques o persones, ye la cuestión de que nun se ta zarrando un alcuerdu, sinón abriéndolu”. “Ta planteándose una cuestión abierta pa que seya compartida pola mayor cantidá de fuerces polítiques y de persones posibles”, comenta Palacios.

“Inevitablemente de cara a conformar una candidatura electoral tien que presentase con dalgún tipu d’oferta pa que les demás persones puean decidir sumase”, declara’l nacionalista. Tamién argumenta que tán falando aquelles fuerces que mostraron interés por ello y espera que la participación medre en cuantes se presente públicamente.

Rellación con otres fuerces
“Hai fuerces que puen mostrar interés al traviés de medios de comunicación, pero en nengún casu lo treslladaron directamente nin s’aplicaron en trabayar por estos ámbitos”, señala Rafa Palacios sobre la rellación con otres sigles que puean compartir el proyectu.

En too casu, Palacios sorraya que’l “procesu ye abiertu y si hai dalguna fuerza política o persona que se quieran sumar pues podrán facelo porque la nuesa voluntá ye que seya lo más participativu posible”.

Aprovechar esperiencies nesta coxuntura
“Aprovechar les fuerces, les esperiencies del trabayu d’estos últimos años dende instituciones, dende gobiernu, dende movimientos sociales”, ye ún de los puntos a favor que’l voceru del Bloque por Asturies destaca de la futura propuesta política.

Sobre la coxuntura política Palacios tamién ye optimista: “Ye coxuntura abierta a cambios, cada vez más plural y yo creo qu’esti ye un bon momentu pa poder situase n’Asturies con fuerza dende l’ámbitu políticu que queremos representar”, sentencia’l nacionalista sobre esti procesu cada vez más cercanu a la so presentación pública.