Palacios apuesta pola continuidá y ampliación de la coalición Bloque-UNA col 2015 como oxetivu

Rafael Palacios, candidatu de Bloque por Asturies-UNA a les eleiciones celebraes hai dos selmanes, apuesta pola continuidá del proyeutu col 2015 como oxetivu. Considera que la coalición “tien que siguir creciendo y ampliándose”.
 
“La voluntá del Bloque y la UNA ye siguir trabayando nesti ámbitu”, señaló Palacios a Europa Press dos selmanes depués de la celebración de les eleiciones nacionales y llocales. “Nun se cuestiona nin la unidá nin el proyeutu porque nun yera un proyeutu eleutoral; yera un proyeuto estratéxicu, de trabayu, de fortalecimientu y de construcción d’una organización d’izquierdes, asturianista y ecoloxista”, esplicó. Asina, recordó que “hai 7.000 persones qu’apostaron por esta propuesta que se trató d’invisibilizar lo más posible porque nun gusta a los partidos tradicionales”.
 
Palacios considera que la iniciativa de “cambiu, renovación y rexeneración de la política asturiana” que propón la so coalición “sigue siendo necesaria”. Entiende que la sociedá asturiana optó pol cambiu, pero un cambiu que significa “profundizar en más de lo mesmo” porque, dende’l so punto de vista, ye “tornar a la política vieya de Cascos y del PP”. No que se refier a les formaciones qu’algamaron representación na Xunta Xeneral el pasáu 22 de mayu, llamentó que “namái preocúpense polos intereses propios del partíu, non pola situación d’Asturies, y negocien en clave interna, repartiéndose’l pastel y el poder”.
 
Otra manera, Palacios va participar na tercer selmana d’esti mes, xunto col representante del Comité de Solidaridá cola Causa Árabe n’Asturies, Miguel San Miguel, na segunda Flota de la Llibertá con destín a Gaza. La primera, en mayu del 2010, sufrió un ataque del exércitu d’Israel n’agües internacionales que provocó la muerte de diecinueve persones.