Palacios: “Queremos tener la fuercia pa condicionar la política del país”

El candidatu de Bloque por Asturies-UNA-LV-GV, Rafael Palacios, muéstrase optimista de cara a la cita coles urnes del domingu. Espera contar col apoyu ciudadanu pa “tener la fuercia pa condicionar la política del país”.

¿Qué tal foi’l desarrollu de la campaña eleutoral?
 
Lo cierto ye que tamos mui contentos de cómo se desarrolló la campaña. Permitiónos averanos al ciudadanu y recoyer la necesidá de demanda d’un cambiu políticu nel país tres un añu perdíu, polo que queremos ser la voz de la izquierda social, l’asturianismu y l’ecoloxismu. Otra manera, la campaña tamién nos sirvió pa fortalecer el proyeutu a llargu plazu que tamos entamando.
 
¿Qué sensaciones tien pal domingu?
 
Tenemos mui bones espectatives porque ta too mui abierto. La nuesa ilusión ye la de tener representación pa poder falar na Xunta Xeneral de les coses que de verdá interesen a la xente. Anguaño somos el referente de munches persones en munchos ámbitos y tenemos la esperanza d’algamar un bon resultáu.
 
Nesta convocatoria sumen al so proyeutu políticu a Los Verdes-Grupo Verde.
 
Nestos momentos somos la quinta fuercia política del país, con una alcaldía y cinco conceyales, y cola incorporación de Los Verdes-Grupo Verde sumamos más de 10.000 votos nes eleiciones de mayu. La so entrada na coalición permite reforzar el proyeutu y tolo que sía sumar ye bono.
 
Les encuestes dan a UPyD representación parllamentaria. ¿Qué supondría p’Asturies la presencia d’un partíu como’l de Rosa Díez na Xunta Xeneral?
 
UPyD representa la derecha más estrema nel Estáu español. Ye más de los mesmo: más PP, más Foro, más IU, más PSOE… Sería una mala noticia p’Asturies la so entrada na Xunta pola so intolerancia y falta de respetu a la pluralidá. Como dixo hai poco Ynestrilles, representa los valores falanxistes tradicionales. Amás paez que ye Rosa Díez, una persona qu’ataca a la política profesional cuando ella lleva 30 años viviendo d’ella, la candidata del partíu por Asturies. Por eso pidimos el votu de los indecisos cola intención de poder condicionar la política del país. Un compromisu por Asturies y dende Asturies.
 
¿Cree que la derecha yá tien zarráu un pautu pa depués del 25-M?
 
La derecha, PP-Foro, pero tamién la izquierda de la derecha, PSOE-IU. L’egoísmu de los políticos, incapaces de pautar unos presupuestos nuna situación tan crítica p’Asturies como ésta, llevónos a esta convocatoria d’eleiciones y nel Bloque-UNA-LV-GV tenemos decidío que nun vamos collaborar con nengún gobiernu que recorte, axuste, ataque a la sanidá y educación públiques y a la tierra y al territoriu con proyeutos como la incineradora. Queremos tener la fuercia pa condicionar la política del país.