Pablo X. Suárez gana’l XXIX Premiu Fernán-Coronas con ‘Entamos d’onomástica’

El XXIX Premiu de Poesía en Llingua Asturiana Fernán-Coronas yá conoz ganador. Ye Pablo X. Suárez, que presentó’l poemariu ‘Entamos d’onomástica’ al concursu lliterariu que se falla en Cadavéu nel marcu de la Selmana Cultural del Padre Galo al rodiu del 7 d'agostu.

El xuráu del gallardón, con un recompensa de 900 euros y la posible espublización de la obra, tuvo conformáu pol ganador del añu pasaú, Gonzalo Llamedo por ‘Los fíos de Bauman’, Carmen Guardado, Marta Mori, Blanca Fernández y Inaciu Galán. Éstos aconceyaron na tarde del llunes, 7 d’agostu, fecha de nacencia del poeta valdesanu, y escoyeron nun primer momentu a trés finalistes ente los siete trabayos presentaos.

Llueu d’un alderique, decidióse por mayoría que’l ganador merecía ser ‘Entamos d’onomástica’, que, una vegada abierta la plica, resultó ser obra de Suárez. Los responsables d’escoyer el poemariu vencedor rescamplaron nel acta “l’equilibriu ente los aspectos formales y el conteníu, que revela un bon dominiu del asturianu”.

Tamién apuntaron que “la voz poética ye bien singular y fai usu hábil y orixinal de la ironía y l’humor”. El Premiu de Poesía en Llingua Asturiana Fernán-Coronas entámalu la Sociedá Popular y Cultural La Regalina de Cadavéu y entrégase'l domingu 27 como parte de les actividaes de la famosa romería.

Na semeya, Llamedo, Fernández, Galán, Mori y Guardado, xuráu del gallardón, aconceyáu na Casa Natal del Padre Galo.