Pablo Rodríguez Alonso, premiu Teodoro Cuesta de Poesía

El prestixosu concursu de poesía n'asturianu que dende va yá 15 años convoca l'ayuntamientu de Mieres. Ello ye qu'esti concursu, con tener una dotación económica inferior a la d'otros, tien ente los poetes asturianos un reconocimientu artísticu penriba de tolos demás, siendo asina que los ganadores del Teodoro Cuesta conviértense automáticamente n'autores reconocíos pola comunidá de creadores. Ye por ello que l'anuncia del ganador d'esti concursu siempre ye noticia, pero más nesta edición 2006, na que'l xuráu decidió da-y el premiu a un autor nuevu que nun tenía asoleyao testu poéticu nengún con anterioridá. Pablo Rodríguez Alonso, que nació nel añu 1979 en Xixón y que ye llicenciau n'historia, mereció'l premiu pol so poemariu "la lluz del nordés" que l'autor definió a Asturies.com como "un estoyu de testos qu'espeyen socesos y esmolecimientos autobiográficos, y que traten dende sentimientos d'amor y desamor, de la perda de persones allegaes o de paisaxes que caltriaron la mio sensibilidá". La llectura del acta que proclamaba a Pablo Rodríguez como ganador del Teodoro Cuesta prodúxose nuna sesión especial nel institutu "Bernaldo de Quirós" de Mieres na que s'axuntaron los ganadores de los catorce certámenes anteriores del "Teodoro Cuesta" dende 1990 p'acá, un llistáu de poetes nel que tan ente otros autores Xuan Bello, Xabiero Cayarga, Pablo Antón Marín Estrada, Lourdes Álvarez o Berta Piñán.

Dase la circunstancia de qu'un soprendíu Pablo Rodríguez descolgó'l telefonu pa sentir la llamada en que lu avisaben del so trunfu nel Teodoro Cuesta mientres diba camín de Cáceres precisamente pa recibir otru premiu, el que-y concediere l'ayuntamientu d'esta ciudá pol so ensayu sobre temes d'historia entituláu "llingua y nacionalidá".