Pablo Quiroga prepara un documental sobre vezos y música de Quimarán y El Valle

El director candasín Pablo Quiroga, que va poco remató'l rodaxe de la cinta de terror "Bisarmes" protagonizada por Txema Blasco, y que tamién presentare nel Festival de Cine de Xixón la cinta "Last picture show" sobre'l pieslle d'unos conocíos multicines de Xixón, ta preparando tamién un documental sobre "Sones y costumes de Quimarán y El Valle" que cuenta con estrenar el mes qu'entra nel Teatru Prendes de Candás, anque la fecha exacta va depender del calandariu d'obres que tan faciéndose nel edificiu del teatru de Candás.

La cinta, de cerca de 50 minutos, espeya la música y cultura tradicionales d'estes dos parroquies del Conceyu de Carreño al traviés del filu conductor que marquen dos caminos tradicionales, el de Santiago al so pasu per Carreño, y el "Camín de les muyeres de la paxa". Fechu cola collaboración del grupu folclóricu "La Folixa" l'equipu de deportes autóctonos "Monte Areo", l'asociación de vecinos "Dolmen" l'asociación de muyeres rurales "Nosotras" y la cooperativa "Monte Areo" la cinta espeya les principales fiestes de les parroquies de Quimarán y El Valle y el so patrimoniu etnográficu.