Pablo Carrera llanza al mercáu un soporte pa posar la gaita

De la necesidá nació la idea y, tres más de diez años de prebes y avances, ésta fíxose posible. Pablo Carrera ta acabante de llanzar al mercáu xunto al so sociu y tamién gaiteru, Pelayo Gallego, POITER, un soporte pa posar esti instrumentu.

 

Xuacu Amieva, l’escocés Fred Morrison, el gallegu Pablo Devigo y el cántabru Sergio Sordo acompañaron a Carrera na presentación d’esti aparatu, de nome POITER, que “revolucionará’l mundu de la gaita”, tal y como adelantó’l llavianés. “Una gaita val alredor de los 1.000 euros como pa dexala en suelu”, apunta’l componente de Duerna, qu’hai más de diez años principió a pensar na utilidá que tendría un soporte nel que poder posar la gaita mientres ésta nun se tocara. “Espliqué-y lo que me facía falta a un collaciu de mio que ye mui apañáu, el corredor de rallys Roberto Solís, y fízome l'artiluxu pa posala. Esi foi'l primer prototipu allá pel añu 2003; dempués comenté-y si nun habría manera facelu plegable pa que fuere cómodu tamién a la hora tresportalu. Entós conseguimos tener dos brazos, ún pa tener pel roncón y otru pa suxetar el fuelle pela parte más próxima al asientu del punteru; y que plegaren verticalmente pa poder recoyelu”, rellata Carrera.

 

Ésti foi’l primer pasu del POITER, que salió recién al mercáu con un costu de 90 euros, anque anguaño tien una ufierta de llanzamientu de 75 euros. Col tiempu, Carrera vio que necesitaba más soporte pa les sos gaites nes actuaciones, pero, por motivos de tiempu, Solís nun podía aparase a facer más aparatos nesi momentu. “Un día tando de vacaciones en Degaña, enseñé-y a Carlos Fernández, inxenieru téunicu y compañeru gaiteru, lo que tenía fecho Roberto. Comenté-y que tenía falta de más y él comprometióse a faceme un par d'ellos, a los que sumó una gran aportación: los brazos ya nun son sólo plegables, sinón qu'introdúcense ún nel otru”. Los cuatro soportes de Carrera llamaben l’atención de los sos colegues allá onde tocaba y el so alumnu Pelayo Gallego vio la posibilidá de fabricalos na so empresa Arkinox, convirtiéndose en sociu del proyeutu. “Entamamos a facer munches prebes pa da-y al productu unes carauterístiques dignes de comercialización; miramos per Internet lo qu'había hasta la fecha y decidimos arriesganos a fabricar; solicitamos la patente, concediéronmosla y d'esta forma nació POITER”, esplica’l gaiteru llavianés.

 

Válidu pa la gaita asturiana, gallega y escocesa

 

Pese a la importante inversión, POITER yá ye una realidá que, de xuru, pronto dará’l saltu fuera de les llendes del país. “El diseñu ye válidu pa gaita asturiana, gallega y escocesa de xuru; llueu tovía podríemos probar si ye válidu pa otres”, rellata Carrera, qu’añade que POITER consta de dos brazos articulaos dotaos con una pinza acolchada que suxeta la gaita; éstos son plegables y métense nel interior del tubu principal del trípode convencional”. El Muséu de la Gaita, escueles de música como la del Llacín, bandes de gaites como Llariegu o gaiteros solistes como Fred Morrison, Pablo Devigo, Xuacu Amieva y Sergio Sordo, ente otros, yá disponen d’un POITER. Ésti, de momento, namái ta a la venta al traviés de la web de Pablo Carrera, estrenada esti sábadu últimu. Hai que destacar qu’esti productu pue personalizase en dellos collores, pa facer xuegu cola gaita.

 

Otra manera, el gaiteru llavianés tamién ta acabante d’anunciar dos iniciatives nes que ta trabayando anguaño. La primera ye la ‘L’aldea perdida’, proyeutu de banda de gaites que quier entamar en La Pola Llaviana xunto con alumnos suyos, y ‘Afuega’l pitu’ un tríu de gaita, acordión y percusión que ta preparando un repertoriu de cantares populares de tol mundu y qu’espera tar pronto sobre los escenarios.