Pablo A. Quiroga y Iván G. Fernández resumen nun documental la presencia asturiana nel FIMI

11 Xunu, 2013 por Redacción

Inicie sesión o rexístrese pa espublizar comentarios

El realizador Pablo A. Quiroga y el periodista Iván G. Fernández son los responsables d’un documental que resume la presencia asturiana nel VIII FIMI de Lisboa. Tamién ufre imáxenes del desfile de mazcaraes y del ambiente del certame.

Del 9 al 12 de mayu, Asturies foi ún de los protagonistes del VIII Festival Internacional Máscara Ibérica (FIMI) de Lisboa, que se desendolcó na céntrica Praça de Rossio y na so redolada. Los Sidros y La Comedia encargáronse de representar a Asturies nel VIII Desfile da Máscara Ibérica, amás de ser ún de los animadores principales del certame mientres los cuatro díes d’un festival pol que pasaron alredor de 300.000 persones, según Progestur, entidá organizadora. Sicasí, la presencia asturiana esta edición nun se resumió namái na mazcarada de Valdesoto, yá qu’hubo representación institucional de Siero, Xixón y Cangues, participación de cocineros de sonadía como Lluis Nel Estrada (Tierra Astur) y Ramón Celorio (Los Arcos), o de los músicos de Skanda, qu’actuaron dientro de la estaya ‘Palco Ibérico’.

Cola idea de reflexar esti importante papel que tuvo Asturies en Lisboa, asina como l’espíritu d’un festival dignu de ver y disfrutar, Algamar Producciones entamó la grabación d’un documental qu’ayeri vio la lluz y que lleva la firma d’Iván G. Fernández y de Pablo A. Quiroga, encargáu de la realización y el montaxe. Esti trabayu inclúi imáxenes de Los Sidros y La Comedia, acompañaos pola Bandina Principado, mientres el desfile, y del ambiente na Praça de Rossio, amás d’entrevistes a Estrada; Amelia Areces, direutora del Serviciu de Promoción Económica del Conceyu de Siero; los cocineros Celorio y Juan Luis Casero; l’hosteleru Germán Bernardo Izquierdo, responsable de la Coctelería Cuarenta Grados de Cangues; César Rodríguez, de la mazcarada cántabra de La Vijanera; los miembros de Los Sidros y La Comedia, Alberto Ramos y Pablo Canal; Hélder Ferreira, presidente de Progestur; José Manuel González Castro, alcalde de Cangues; y Pablo R. Guardado, unviáu especial d’Asturies.com a Lisboa. Una manera perbona d’averase a un certame que medra añu tres añu, al igual que’l pesu que tien el nuesu país nél pese a l’ausencia de sofitu institucional por parte del Gobiernu..

Participación lisboeta nel II Festival Arcu Atlánticu

Progestur va participar otra vuelta nel Festival Arcu Atlánticu de Xixón, que nesta segunda edición ta dedicáu Naunnt/Nantes, población de la Bretaña histórica que toma’l relevu de Portugal. Sicasí, la presencia portuguesa ta confirmada nel certame gracies a les bones rellaciones de Progestur col Conceyu de Xixón. Nesta ocasión, Lisboa va centrar l’actividá lusa na festival, col entamu d’una muestra representativa de la ufierta turística y culutural, asina como de productos de la zona. Tamién habrá representación musical, col fadu como protagonista principal. Esti añu, el Festival Arcu Atlánticu va celebrase del 26 de xunetu al 4 d’agostu.