Pa Pedro Sánchez les naciones del Estáu son España y “a lo menos Cataluña, País Vasco y Galicia”

|
By Marta Jara / eldiario.es (Pedro Sánchez se impone al PSOE del pasado) [CC BY-SA 3.0 es (http://creativecommons.org/licenses/by-sa/3.0/es/deed.en)], via Wikimedia Commons

Pedro Sánchez Castejón considera que l’Estáu ta formáu por cuatro naciones: España y “a lo menos Cataluña, País Vasco y Galicia”. El secretariu xeneral del PSOE, defensor nesti tiempu últimu de la plurinacionalidá del Estáu español, dalgo que quedó afitáu nel Congresu Federal d'agostu, dexa fuera d’esta llista a Asturies.

El políticu madrilanu fixo estes declaraciones nun almuerzu informativu entamáu por Europa Press especificando qu’una nación “nun s'identifica coles llendes d'un Estáu, sinón que nun Estáu pueden compartir territoriu más d'una nación”. Asina, apuntó qu’España ye una nación y que nel Estáu “a lo menos” hai trés territorios con vocación de selo, esto ye, Catalunya, Euskadi y Galicia, según apuntó.

El restu de territorios, como Asturies, nun entraríen de primeres nesta llista que, hasta agora, el PSOE nun s’atrevió a definir. Esta defensa de la plurinacionalidá del Estáu naz del Congresu Federal últimu socialista, celebráu n’agostu, y dende entós tampoco dende la FSA dexaron a les clares qué papel va xugar Asturies nesta “nación de naciones”.

Esta postura socialista ye un reflexu del procesu constitucional, cuando Asturies foi pela vía llenta (artículu 143) nel desarrollu de les autonomíes, camín que nun tomaron Catalunya, Euskadi, Galicia y Andalucía (artículo 151).

Semeya: By Marta Jara / eldiario.es (Pedro Sánchez se impone al PSOE del pasado) [CC BY-SA 3.0 es (http://creativecommons.org/licenses/by-sa/3.0/es/deed.en)], via Wikimedia Commons.

Contador Estadistiques