Ovidio ye mundial

Cola campaña electoral oficial al doblar la esquina y cola oficiosa yá entamada dende cuantayá, el líder del PP n'Asturies ta acabante d'enllenar los escaparates de los quioscos con un llibru col que pretende esfaltar la so candidatura a la presidencia del Principáu, suañu que toles encuestes y quinieles dan yá por imposible énte la mayoría socialista que se ve venir. "Yo creo en Asturias" ye'l títulu de la obra, y nella el Raymond Poulidor de la política asturiana espeya les sos tesis y ellaboraciones sobre la política y economía asturianes y la identidá del pueblu astur.

Por supuesto, a los que nun dexa ensin críticar ye al partíu nel poder. Sánchez diz que nel PSOE asturianu manden los guerristes, que son "lo más decrépito" del socialismu n'Europa. Tamién se despacha Ovidio cola URAS, la parte esgayada del PP. Del partíu renovador diz que los primeros en renovase tendríen de ser ellos porque lleven metíos en política dende qu'entamó la democracia (mientres qu'elli namás lleva con cargu dende 1.983). Lo curioso ye que repartiendo d'esta manera depués llame a evitar "el ambiente de crispación permanente y de tensión política y social "

Sobre la llingua d'Asturies la llumbrera popular nun tien dulda de que "para la práctica totalidad de los asturianos la lengua materna es el español" idioma xunta'l que conviven, en réxime de vasallaxe "los bables" pa los que nun esiste una voluntá de normalización, nin muncho menos debería tomase en serio la posibilidá d'oficializar tala cosa.

P'afondar na personalidá histórica d'Asturies, el cacumen privilexáu que firma tan ablayante llibru parte de los llugares comunes sobre la historia y cultura del país, como la batalla de Cuadonga (madre de la nación española) la gaita o la esistencia de los masuñadísimos bables pa llegar a la conclusión de qu'Asturies tien una identidá propia, pero qu'esta nun quita pa que nos enxertemos a gustu nun proyectu "superior" como ye España. Ello ye bono según el líder popular porque esa xuntanza d'identidá propia con sentimientu español lleva a que'l restu d'España nos considere un pueblu "simpático" siendo la simpatía una de les cualidaes más importantes que nos caracterizaríen.

Quiciás debiera traducise esi "simpático" castellanu orixinal al asturianu como "prestosu" o quiciás como "célebre". D'escoyer la segunda opción nun queda dulda de que los asturianos facemos gracia, al paecer del candidatu popular, anque más d'un pensará que'l célebre ye elli, por nun dicir "de traca" o hasta "mundial" categoría cimera de lo risible.