Ovidio Sánchez, que lo negara n'avientu, sí fixo negocios con De Arístegui y Gómez de la Serna

La documentación que manexa'l fiscal Conrado Sala y el xuez José de la Mata involucren al senador Ovidio Sánchez na trama entamada por Gustavo de Arístegui y Pedro Gómez de la Serna. El popular negara n'avientu que tuviera rellación dalguna con ella.

Un alcuerdu de confidencialidá fecháu n'ochobre del 2013 y dellos correos electrónicos a los que tuvo accesu'l diariu 'El Mundo' desvela que Sánchez trató d'introducir a Central Lechera Asturiana nel mercáu indiu previo'l cobru d'una comisión. A ello dedicábase l'ex embaxador De Arístegui xunto col diputáu popular nel Congresu Gómez de la Serna, negociu illegal que ta siendo investigáu pola Audiencia Nacional. En dichu alcuerdu, Sánchez llevaría'l 25 por cientu de dicha operación.     

El popular xustificóse esta mañana apuntando que too yera "una intención" y que les práutiques d'intermediación son llegales siempre qu'haya un permisu de compatibilidá del Congresu o Senáu. Poro, al igual que n'avientu, cuando se desatapó la trama, Sánchez niega tener nada que ver colos negocios illegales de De Arístegui y Gómez de la Serna.

Naquel tiempu apuntó que la so única rellación col diputáu popular yera l'alquiler d'un despachu de so en Madrid, anque la información de 'El Mundo' señala que dichu arrendamientu foi posterior, ente 2014 y 2015, al alcuerdu sobre la introducción de Central Lechera Asturiana na India, lo qu'indica que los negocios ente les dos partes veníen d'enantes. Otra manera, la empresa asturiana negó tener rellación con Sánchez, dalgo que tamién confirmó'l popular esta mañana, nin interés n'entrar na India al ser un mercáu autosuficiente en productos llácteos.