Ovidio Sánchez quier una reforma del estatutu “definitiva” y afirma qu’ha llegase “a la oficialidá enantes que la cooficialidá”

El presidente del PP asturianu y candidatu a la Presidencia d'Asturies Ovidio Sánchez, declaróse partidariu de llevar alantre la reforma del Estatutu d'Autonomía n'entamando la llexislatura próxima, enfotándose amás en que la so redacción sía "casique definitiva".

El popular quier echar el piesllu al desarrollu territorial pa evitar "reivindicaciones permanentes de los grupos nacionalistes, que sólo busquen desgastar el proyectu d'España". Anque nun detecta un gran enfotu en facer la reforma, Sánchez diz que ye preciso facela en cuantes que tolos demás territorios tán con ello. Sánchez esplicó tocante a la cuestión del asturianu, que "la llei actual del asturianu ta ensin usar" y que "l'asturianu nun s'usa nin nel Parlamentu" polo qu'esplicó que "primero de plantear la cooficialidá habrá que llegar a la oficialidá".

El dirixente popular declaróse partidariu de privatizar la xestión de la TV autonómica pero calteniendo nos sos puestos a los actuales profesionales y asegurando un control públicu del Ente.