Ovidio Sánchez márcase contra l’embalse de Caliao

El presidente del Partíu Popular d'Asturies, Ovidio Sánchez dio ayeri una rueda de prensa na que denunció'l retrasu de delles obres hidráuliques n'Asturies, sobremanera en referencia les Estaciones Depuradores d'Agua Residual. Ovidio Sánchez acusó del retrasu nestes infraestructures al Gobiernu autonómicu, asegurando que l'executivu d'Areces cobra un canon de saneamientu que nun revierte nuna meyora de les infraestructures de saneamientu, incumpliéndose amás un mandáu llegal pol que tolos llugares que pasen de 2.000 habitantes han tener rede de saneamientu d'agua.

Amás d'emponderar l'esfuerzu presupuestariu de la etapa de gobiernu del PP en comparanza cola situación actual, Ovidio Sánchez posicionó al so partíu en contra del embalse de Caliao, la gran infraestructura hidráulica que se propón sacar alantre l'executivu asturianu anque IX-BA ta claramente posicionada a la escontra de la mesma. Sánchez emponderó la iniciativa d'IX , que se plantega'l votu negativu a los presupuestos xenerales del Estáu si Madrid nun refuga la presa de Caliao. Sánchez pidió una demostración de que nun esisten otres alternatives, y acusó a la FSA-PSOE d'encargase un estudiu a midida nel INDUROT pa xustificar la necesidá del banzáu, llamando l'atención Ovidio Sánchez sobre la gravedá en términos mediuambientales que tien la construcción d'un embalse nel marcu natural del Parque de Redes y pidiendo que s'analicen toles posibles alternatives, con referecia especial a la posibilidá de facer un embalse alternativu n'Ayer. Ovidio Sánchez, que pidió tamién compensaciones pa los conceyos que soporten infraestructures hidráuliques, contradiz les declaraciones d'otros representantes del PP como Alicia Castro que se mostraron al favor del embalse de Caliao.