Ovidio Sánchez diz que'l PP asturianu va renovase en pasando les xenerales

El presidente del PP d'Asturies, Ovidio Sánchez, dixo que'l so partíu va facer la "renovación" que corespuenda facer en pasando les próximes elecciones xenerales del 2008. El dirixente popular aseguró que los cambios nun pudieron realizase tovía pa non celebrar un congresu previu a los comicios, polo que insistió en que'l cónclave va tener llugar tres la cita electoral, "y ehí van definise los llideralgos".


Sánchez fizo estes declaraciones nos pasiellos de la Xunta Xeneral del Principáu enantes de treslladase a Madrid, p'acudir al Senáu. El dirixente popular respondió asina a la entruga de si tomaba como una alusión directa les declaraciones de la diputada nacional Alicia Castro, qu'anunciara esta selmana la so retirada de la política activo reclamando una renovación nel partíu.
El presidente del PP dixo que la idea de la renovación paez-y "fenomenal" dende una persona "con una gran esperiencia" como Castro. "Ye una bona reflexón y ta bien", señaló.
P'acabar, Sánchez resaltó la figura política d'Alicia Castro: "siempre la sentí mui allegada, especialmente col so apoyu na última campaña".