Otres 50.000 firmes contra los eventos taurinos n'Asturies

La campaña entamada pola asociación Huellas del Sella pola corrida en plaza portátil del sábadu en Benia repite l'ésitu de la del añu pasáu pola programada Mestas de Con.

Mañana a les 11 hores van entregase nel Rexistru del Conceyu d'Onís les firmes recoyíes hasta'l momentu pola campaña ‘No a la corrida de toros en Onís. Asturies libre de maltrato animal para siempre’ entamada na plataforma dixital Change.org por Víctor Manuel Iglesias y roblada pola asociación protectora d'animales del oriente del país. Cuando s'escribíen estes llinies contaba con 48.887 sofitos, que nun aparen de xubir.

"Pidimos al alcalde José Manuel Abeledo Viesca que nun xuegue cola ambigüedá y que revoque l'autorización pa la plaza de toros portátil al nun contar de reglamentu que garantice la seguridá ciudadana", reclamen dende Huellas del Sella. Nel conceyu va tener llugar el sábadu una corrida de toros a les 18 hores col ‘rejoneador’ alicantín Andy Cartagena, el toreru mexicanu Isaac Fonseca y el novilleru castellanu Daniel Medina.

L'añu pasáu yá hebo un intentu d'entamar un eventu taurín na zona, nel conceyu vecín de Cangues d'Onís, con una gran oposición ciudadana, hasta'l puntu de recoyer más de 57.000 firmes nuna campaña asemeyada. Daquella consiguióse l'oxetivu de frenala por un error de la Fundación Toro de Lidia al escoyer la finca pa instalar la plaza de toros portátil, cuestión que la empresa Tudanca Toros cuidó nesta ocasión.

Na semeya, la plaza de toros portátil instalada na finca Morán de Benia.