Otra obra de Verne protagoniza'l segundu club de llectura d'Iniciativa pol Asturianu

Trátase de la novela 'Los solevaos de la Bounty (Les Révoltés de la Bounty)', tornada al nuesu idioma por Xesús González Rato.

Tres la esperiencia del pasáu mes de mayu, cuando Iniciativa pol Asturianu entamó esta iniciativa nel pub uviedín Corner's, naquella ocasión con 'La vuelta al mundu n'ochenta díes', agora repite con otra obra de Jules Verne. L'actividá va dividise en dos sesiones, la primer d'elles el llunes y la segunda, el día 17, dambes de magar les 20.30 hores.

"L’oxetivu ye ameyorar la conocencia d’asturianu asina como encamentar a los participantes a consumir lliteratura na nuesa llingua. Con esta propuesta Iniciativa pol Asturianu quier averar la lliteratura a espacios onde nun ye vezu atopala, polo que nun ye necesario tener degún conocimientu previu del idioma p’apuntase a l'actividá", apunten dende'l coleutivu. El preciu pa participar nesti club de llectura n'asturianu ye de 20 euros, cantidá qu'inclúi'l llibru editáu por Trabe y dos consumiciones nel Corner's, establecimientu asitiáu na cai Xeneral Zuvillaga númberu 6. La matrícula pue formalizase nel propiu chigre.