Otegi: "refugamos la violencia pa imponer un proyectu políticu"

El miembru de Batasuna Arnaldo Otegi aprovechó la so vez d'última palabra nel xuiciu que se celebra na so contra na Audiencia Nacional p'asegurar que Batasuna "refuga l'usu de la violencia pa imponer un proyectu puramente políticu".

L'ex voceru de la illegalizada formación añadió que quería "reseñar con calter absolutamente claru, nidiu", que la izquierda abertzale fizo "una apuesta poles víes pacífiques y democrátiques" y qu'apuesta "por un procesu de soluciones democrátiques".

Denunció que "años de confrontación y conflictu" edificaron "una muria que pretende la sordera sobre les coses que dicimos", algo que, añadió, "ta asocediendo nesta circunstancia política concreta".

L'acusáu nun pudo rematar esti alegatu ante la intervención del presidente del tribunal Fernando García Nicolás, pero sí pudo esponer otros puntos, ocasión qu'aprovechó pa llanzar un mensaxe de solidaridá de la izquierda abertzale al pueblu sah.arianu. "Quiero enviar solamente un mensaxe solidariu de parte de la izquierda abertzale al pueblu sah.arianu na so xusta llucha", dixo como puntu final de la so intervención. 
  
Cuestiones polítiques y xudiciales
Otegi, que tovía tien pendientes na Audiencia Nacional dos causes por terrorismu (Bateragune y 'herriko tabernes'), entamó'l so turnu d'última palabra indicando que mientres los dos xornaes del xuiciu "el presidente, con buen criteriu, intentó llendar cuestiones de índole política". "Estes cuestiones nun se resuelven nos tribunales", añadió.
 
 "La mio presencia yá casi habitual en xuicios d'esti tipu obedez a la necesidá de dellos sectores d'introducir estos temes de naturaleza política", repostió y defendió que "ye difícil qu'un actu políticu torne n'enaltecimientu". El xuiciu queda vistu pa sentencia.

Intervención d’Eguiguren
Per otru llau, el presidente del Partíu Socialista d'Euskadi, Jesús Eguiguren, reconoció ante'l tribunal encargáu de xulgar a los miembros de Batasuna Arnaldo Otegi, Joseba Permarch y Joseba Álvarez, que conocía'l conteníu de la declaración que diba lleese nel mitín celebráu n'Anoeta en payares del 2004.
  
Eguiguren matizó que nun yera él l'únicu que sabía los términos de la declaración que, destacó, "conocía media España". Reconoció, amás, caltener reuniones con Otegi y otros miembros de la formación illegalizada.
  
El presidente del tribunal, Fernando García Nicolás, impidió que la lletrada Jone Goiricelaia preguntare a Eguiguren sobre la so afinidá colos postulaos de la izquierda abertzale y interrumpió'l testimoniu del presidente del PSE en más de trés causes.
 
 "Soi un vascu qu'ama a la so tierra penriba de too. Llevo 30 años nel Partíu Socialista", dixo Eguiguren, que saludó a Otegi antes de sentase nel llugar asignáu pa realizar la so declaración. Añadió que conoz a los trés miembros de Batasuna porque toos fueron parlamentarios y caltién con ellos "l'amistá normal que surde de conocese".