Otegi reafirma la “estratexa pacífica”

|

L’ex portavoz de Batasuna, Arnaldo Otegi, fixo nueves declaraciones rellacionaes col fin de la llucha armada per parte d’ETA. El dirixente abertzale planteó nuna entrevista a The Wall Street Journal qu’ETA ta llista “p’abandonar la violencia”.

“Abandonar la violencia y participar nuna estratexa pacífica pa crear un estáu vascu independiente”, foi la opinión qu’Arnaldo Otegi manifestó dende la cárcel al periódicu estaunidense The Wall Street Journal.

Estes declaraciones prodúcense nun marcu nel que s’especula sobre la publicación d’un comunicáu d’ETA nel que podría anunciar l’abandonu definitivu de les armes. Sicasí, Otegi nun confirmó qu’ETA tea preparando l’anunciu.

Lo que sí que reafirmo’l dirixente de la izquierda abertzale foi que’l sector políticu al que representa s’opón “a cualesquier violencia como forma p’algamar oxetivos políticos”

“Tamos dispuestos a dar tantes garantíes como seyan necesaries p’amosar que la nuestra postura ta afitada y ye irreversible”, insistió Otegi na entrevista sobre les dudes que llevanta la nueva postura de la izquierda abertzale. Nesti sen, l’ex portavoz de Batasuna añadió que- paecería lóxicu “qu’el Gobiernu español pidiese garantíes pa caltener la seguridá de los sos ciudadanos”.

“Nun hai novedá”

Pela so parte, el vicepresidente primeru del Gobiernu español y ministru del Interior, Alfredo Pérez Rubalcaba, cree que “nun hai novedá” na entrevista a Arnaldo Otegi. El dirixente socialista opinó que les declaraciones de la izquierda abertzale “merecen un sileciu prudente” y repitió que Batasuna tien que pidir a ETA que “lo dexe”.
 

Contador Estadistiques