Otegi, Permach y Álvarez absueltos pola Audiencia Nacional

L’Audiencia Nacional absolvió a los dirixentes de la izquierda abertzale Arnaldo Otegi, Joseba Permach y Joseba Álvarez del supuestu delitu de “enaltecimientu del terrorismu” pol actu del Velódromu d’Anoeta de 2004.

La Fiscalía reclamaba 18 meses de prisión y l’acusación popular exercida pol Foro de Ermua esixía dos años de cárcel. Sicasí, los cabezaleros de la izquierda abertzale quedaron absueltos por mor de la sentencia onde’l tribunal afirma qu’hai “series dudes” sobre que los imputaos ordenaran l’enseñu d’imáxenes de militantes d’ETA.

Asina ye como la Sección Segunda de la Sala de lo Penal de l’Audiencia Nacional afirmó que la responsabilidá namás que se pue exisir a los autores concretos del fechu delictivu y nun se pue espardir a terceros.

Sorraya los pasos de paz
El fallu xudicial sorraya amás qu’Arnaldo Otegi defendió nel mítin del Velódromu d’Anoeta “la necesidá d’un procesu de diálogu y negociación de manera pacífica y democrática”. Too ello ensin nenguna referencia a ETA o xustificar la so actividá.

Per otru llau, los xueces tamién critican na sentencia la investigación fecha pola Guardia Civil y señalen que los sos informes “nun esclarien nin aporten datos esternos que puean demostrar la responsabilidá de los acusaos en calidá d’autores de lo asocedíu nel Velódromu”.