Os Folkgazáis presenta'l so segundu discu con dos conciertos nel Cine Teatro de Ribadeo

‘Haiga’ ye’l nome del segundu trabayu del Conjunto Os Folkgazáis, que continúa cola so apuesta de música de baille con lletres en gallego-asturiano. Los d’A Veiga van ufrir esta fin de selmana dos conciertos nel Cine Teatro de Ribadeo.

Formáu por músicos del occidente asturianu y de la mariña de Lugo, Os Folkgazáis mantienen l’espíritu d’aquelles orquestes y conxuntos que tanto ésitu tuvieron a partir de la década de los 40 nel occidente del país. Conocíes como ‘orquestinas’, incorporaben ritmos que llegaben del otru lláu del charcu, como habaneres, boleros, swing, samba o mambo. Asina, la banda astur-gallega pretende poner en valor la música en direutu y reivindicar la vuelta de los salones de bailles y sales de fiestes qu’acoyíen a estes orquestines.

Tres el bon recibimientu de ‘Cama de folkga’, primer discu d’Os Folkgazáis, los d’A Veiga decidieron apostar por afondar nel mesmu estilu, autodenomináu ‘Pachanga folk’. Asina, esti segundu llarga duración inclúi cantares de baille de los años 50 y 60, y, como gran novedá, la inclusión d’un ‘narcocorrido’ entituláu ‘N’a raia’, nel que collaboren espertos como l’acordionista norteñu Mario Rodríguez y el guitarrista cubanu Waldemar Guerra. La formación d’O Folkgazáis ta compuesta por Abel Pérez (acordión), David Moirón (saxofón), Jorge Deaño (batería), J. Antonio Fernández (trompeta), Marcos Méndez (baxu) y Ruth Martín (voz y pandereta). 

La presentación d’esti trabayu autoproducíu, grabáu por Miguel Herrero nos estudios ACME d’Avilés y masterizáu en Green Desert Mastering por Kike Sanchís, va tener llugar esti vienres, a partir les 21.30 hores nel Cine Teatro de Ribadeo. Esti conciertu ye priváu pa les persones qu’ayudaron a financialu a traviés del crowdfunding o micromecenazgu per Internet, pero’l grupu ufierta la posibilidá de mercar una entrada y el CD pol preciu de 12 euros hasta completar l’aforu. Mentes, mañana, nel mesmu llugar y la mesma hora, van ufrir otra actuación, nesti casu entamada pol Concello de Ribadeo, con entraes a 3 euros.